Dy persona janë arrestuar nga policia e Kuçovës dhe dy të tjerë është shpallur në kërkim. Kjo pasi për rreth dy orë kanë marrë peng një 18-vjeçar në terminalin e autobusëve.
Uniformat blu kanë bërë të ditur se kanë vënë në pranga Krenar Hysenbelli 38 vjeç dhe 23-vjeçarin Çerçis Turhani, banues në Divjakë, ndërsa u shpall në kërkim A.H, 35 vjeç dhe A.H, 41 vjeç, të dy banues në lagjen 11 Janari, Kuçovë.
Nga sa mësohet këta persona e akuzonin 18-vjeçarin se ka ngacmuar vajzën e njërit prej tyre, ndaj dhe kjo është arsyeja se pse e kanë marrë peng të riun. Ndërkohë që policia po punon për kapjen e autorëve të tjerë.
“Arrestimi dhe shpallja në kërkim e shtetasve të lartpërmendur u bë pasi për rreth dy orë në mjediset e Terminalit të autobuzave në lagjen Tafil Skëndo, Kuçovë, për motive të dobëta i kanë hequr në mënyrë të paligjëshme lirinë shtetasit E.K, 18 vjeç, banues në lagjen 11 Janari, Kuçovë”, thuhet në njoftimin e policisë.
Materialet i kaluan Prokurorisë së Rrethit Gjyqësor Berat për veprën penale “Heqje e paligjshme e lirisë e kryer në bashkëpunim”.
