Superstrada Tiranë -Durrës do të nisë brenda pak ditësh procesin e riasfaltimit që nuk është rikonstruksion total dhe që do financohet në bashkëpunim me bankën botërore.
Rikonstruksioni do të kërkonte një investim prej 33 milion eurosh ndërsa riasfaltimi kërkon vetëm 11 milion euro.
“Kemi marrë masat që të fillojmë këtë vit riveshjen me një shtresë asfalti, por që ajo rrugë në terma afatgjatë të ketë qëndrueshmëri dhe të kthehet në një rrugë me standarde, bëhet fjalë me vlera mbi 20-30 mln euro minimalisht. Kjo është ç’do të thotë degradimi i një aseti dhe lënia pas dore në vite në vazhdim”,- ka thënë Gjiknuri.
Po kështu nga buxheti I shtetit do të duhet të dalin edhe 4 milion euro të tjera për përfundimin e rrugës Tiranë-Elbasan.
“Flas për rrëshqitjen e fundit pas tunelit të Elbasanit, kosto e të cilës sipas studimit inxhinierik është mbi 4 mln euro”,- është shprehur ai.
Fatura të tilla kaq të fryra për rikonstruksionin e rrugëve janë për shkak të mungesës së mirëmbajtjes.
Institucionet ndërkombëtare kanë ngritur shpesh si shqetësim buxhetin e ulët që akordohet nga qeveria për mirëmbajtjen e rrugëve ndërsa vetë qeveritë shprehin pamundësinë e financimit për këtë proces.
Një nga shkaqet e vendosjes së tarifës në rrugën e kombit ishte edhe pamundësia e mbulimit nga buxhetit i shtetit të vlerës që nevojitet për mirëmbajtjen e kësaj rruge.
Kostoja për mirëmbajtjen e rrugëve kombëtare në 5 vite llogaritet rreth 320mln euro.
