Partia Demokratike ka paralajmëruar se të enjten do të nisë aksioni opozitar për mosbindje civile. E ftuar në studion e lajmeve të Ora News, deputetja e PD, Grida Duma nuk dha shumë detaje nëse do të ketë një bojkot apo jo, por tha se ajo personalisht të enjten do të jetë pranë qytetarëve.
Ilva Tare: Të enjten do të ketë bojkot të seancës së parlamentit?
Grida Duma: Të enjten unë personalisht, nuk di do të ketë bojkot apo jo sepse këto janë vendime që merren në forumet e partisë. Nuk kam pasur dhe as nuk kam qenë pjesë e ndonjë vendimmarrje specifike. Kam ndjekur gjithmonë vendimet e forumeve të partisë. Unë personalisht do të jem pranë qytetarëve atje ku sigurisht është prioriteti kryesor për të kuptuar që kemi një produket nga e gjitha kjo.
Ilva Tare: Por ju jeni votuar si deputete duhet të jeni dhe në parlament
Grida Duma: Sigurisht kam ndërgjegjjen e plotë për të kuptuar prioritetet, që në këtë rast janë qytetarët?
Duma komentoi edhe mbledhjet e përbashkëta të PD dhe LSI, që sipas saj janë shumë normale.
Ilva Tare: A janë të drejta mbledhjet në selinë e PD me aleatët e tjerë dhe LSI?
Grida Duma: Nuk ka asnjë dyshim që janë të mirëpritur të gjithë ata aleatë, forca apo grupe interesi që bëhen bashkë në kauzën opozitare. I takon opozitës të mbajë edhe spektrin edhe forcën sepse PD është forca më e madhe opozitare dhe kjo nuk ka asnjë dyshim që duhet të shkojë në këtë logjikë.
