“Represioni dhe dhuna ndaj protestuesve në Kukës është thjesht rishfaqje e arrogancës dhe frikës që ka pushtuar Edi Ramën këto 24 orët e fundit”.
Kështu e nis reagimin e radhës përmes rrjeteve sociale kryetarja e LSI-së, Monika Kryemadhi në lidhje me arrestimet e ndërmarra nga policia për protestën në Rrugën e Kombit. Kryemadhi garanton protestuesit për mbështetjen e opozitës.
“Protestuesit e ndaluar dhe të shoqëruar në komisariatet e Tiranës kanë mbështetjen tonë dhe të të gjithë qytetarëve të ndershëm të këtij vendi, që e kuptojnë dhe dënojnë këtë taksë absurde, haraç të Edi Ramës për oligarkët e tij. Siguroj të ndaluarit nga policia dhe familjarët e tyre se kjo histori nuk mbaron këtu! Ne do të kërkojmë me forcën tonë dhe të ligjit, jo vetëm lirimin e tyre, por edhe rikthimin e dinjitetit të nëpërkëmbur nga falangat e qeverisë”, vijon kryetarja e LSI-së.
Në vend të qytetarëve që protestojnë, Kryemadhi thotë se policia duhet të angazhohet në arrestimin e ish-zyrtarëve të saj të përfshirë në trafikun e drogës. “Edi Rama që kërcënon sot banorët e Kukësit dhe protestuesit e ndaluar, bën mirë të angazhojë policinë, forcat speciale, prokurorinë, madje dhe vetë Saimir Tahirin po të dojë, që të gjejë ish-drejtuesit e policisë të arratisur dhe të përfshirë në trafikun e lëndëve narkotike. Bën mirë të hedhë sytë e të kërkojë hetime të ndershme për Elvis Roshin apo ish shokët e tij të grupit parlamentar, që akuzohen për krime të rënda. Kjo është detyra për një kryeminister të përgjegjshëm dhe jo peng të krimit dhe pazareve me banditët”, vijon reagimi. Sipas Kryemadhit, për shkak të reagimit popullor qeevria do të tërhiqet dhe ndryshojë tarifimi.
“Ne si LSI, jemi të bindur në betejën tonë për ndryshimin e tarifës dhe mbështetjes ekonomike për banorët e kësaj zone. Askush nuk mund ti detyrojë qytetarët e Kukësit dhe zonave përreth, që në skajshmerinë e varfërisë ku i ka çuar kjo qeveri të paguajnë taksë për orekset e klientëve të Edi Ramës. Asnjë vegël e Edi Ramës, apo qoftë dhe ai vetë, nuk do të munden të dhunojnë të drejtën e banorëve të Kukësit për të mos u varfëruar çdo ditë e më shumë për hir të qejfeve dhe perversiteteve të një kryeministri të papërgjegjshëm”, thuhet në reagim. “Lsi dhe opozita shqiptare do të vazhdojë të jetë në krah të banorëve protestues dhe do të kundërshtojë çdo akt dhune, apo presioni që përpiqet të frikësojë Kukësin dhe kuksianët. Ne do të vijojmë përpjekjen dhe betejën tonë për të rikthyer besimin te shqiptarët e gënjyer dhe zhgënjyer nga qeveria e narkotrafikut”, mbyll reagimin e saj kryetarja e LSI-së.
