Kryeministri i Kosovës, Ramush Haradinaj ka marrë vendim që të shkarkojë nga detyra edhe drejtorin e Agjencisë Kosovare për Inteligjencë, Driton Gashi. Në kërkesën e Haradinajt dërguar kreut të AKI-së të cilën e ka publikuar portali Indeksonline, i kërkohet këtij të fundit largimi i menjëhershëm.
Vendimi për shkarkimin e Driton Gashit, ka ardhur si rezultat i arrestimit të djeshëm të gjashtë shtetasve turq në Kosovë dhe deportimit të tyre në Turqi me kërkesë të shtetit turk. Bashmë me Gashin Haradinaj shkarkoi edhe ministrin e Brendshëm Flamur Sefaj.
Këto masa u morën menjëherë pas skandalit ku gjashtë mësues Mustafa Erdem, Yusuf Karabina, Kahraman Demirez, Cihen Ozkan, Hasan Gunakan dhe dy drejtues të institucioneve shkollore turke në Kosovë, pavarësisht se kanë qenë të pajisur me leje qëndrimi në Kosovë, u janë pezulluar ato. Të enjten në mëngjes Policia e Kosovës i ka arrestuar dhe më pas janë deportuar për në Turqi.
Këto masa janë konsideruar të papranueshme dhe reaguan menjëherë krerët e lartë të shtetit, ku fillimisht presidenti Hashim Thaçi bëri të paditurin, më pas edhe Haradinaj u shpreh se nuk kishte asnjë dijeni për këto masa të marra.
Ato ishin shpallur në kërkim nga policia turke, pasi ishin future në listën e personave që konsiderohen si anëtarë të organizatës së Fetulla Gylen.
