Kryeministri Edi Rama dështoi të justifikojë vendosjen e “gjobës” 5-20 euro për çdo automjet që kalon në Rrugën e Kombit, gjatë fjalës së tij në Parlament të Enjten. Ai, sërish, u mundua të gjejë përgjegjësit tek ish-qeveria Berisha, e cila e ndërtoi rrugën në vitin 2009, si edhe te ministrat e LSI-së, të cilët kanë sugjeruar tarifimin e rrugës gjatë kohës kur bashkëqeverisnin me PS.
Rama nuk përmendi asnjë fjalë se përse qeveria nuk ka mundësi të mirëmbajë rrugën me fondet publike. Kryeministri duket i vendosur që të mos aplikojë rialokimin e fondeve që përdoren për projektet PPP dhe fasadat e “Rilindjes Urbane”, për të investuar në aksin më të rëndësishëm rrugor shqiptar.
Shefi i qeverisë e përqëndroi fjalën e tij para deputetëve në krahasim shifrash me vendet e rajonit dhe Bashkimit Europian, një mënyrë efikase e populizmit politik, për t’iu shmangur thelbit.
Në asnjë moment, kryeministri nuk dha shpjegim edhe përse, ndryshe nga sa është parashikuar në kontratën fillestare me konçensionarin, qeveria nuk ka parashikuar përjashtimin e banorëve të Kukësit nga kjo tarifë. Gjithashtu, term në kontratë ka qenë edhe pajisja me abone e automjeteve që qarkullojnë më shpesh në këtë aks rrugor.
Ai u shpreh se, pas 6 muajsh, do të diskutohet sërish me konçensionarin, për të përcaktuar modalitetet për zbutjen e tarifës për përdoruesit e shpeshtë të rrugës, duke iu referuar kryesisht autobusëve dhe furgonëve të pasagjerëve.
Por, kjo deklaratë nuk bindi deputetët në sallë, të cilët reaguan pa mikrofonë ndaj fjalëve të kryeministrit. Për ligjvënësit reargues, kjo është një gënjeshtër e Kryeministrit, pasi qeveria i ka pasur mundësi që t’i aplikonte këto lehtërisa para se kompania konçensionare e udhëhequr nga miku i kreut të qeverisë, Shefqet Kastrati, të vendoste traun në tunelin e Kalimashit.
