Ish-kryeministri Sali Berisha ka reaguar në lidhje me disa pamje të publikuara nga mediat kosovare, ku shihen avionë luftarakë që fluturojnë mbi qiellin e Luginës së Preshevës.
Përmes një statusi në Facebook, Berisha e cilëson këtë si një terror hakmarrës primitiv i Beogradit, pas arrestimit nga policia e Kosovës e zyrtarit serb Marko Gjuriç.
Sipas Berishës, stërvitja ajrore me avionë ushtarakë shkel marrëveshjen e NATO-s me Beogradin për Luginën e Preshevës.
Statusi i plotë:
Terror hakmarrës primitiv i Beogradit ndaj shqiptarëve të Preshevës për arrestimin e provokatorit Gjuriç!
Të dashur miq, në një përpjekje të hapur konflikti Presidenti i Serbisë, pas provokacionit të ulët, dërgimit ilegal në Mitrovicë të ultranacionalistit Gjuriç dhe arrestimit të ligjshëm të këtij vagabondi politik nga policia e Kosovës, shpalosi sot skenarin e konfliktit në Preshevë.
Në një akt terrorizimi të popullatës civile shqiptare të Luginës së Preshevës, ai zhvilloi stërvitje ajrore me fluturime të ulëta të avionëve ushtarakë, duke shkelur në mënyrë flagrante marrëveshjen e NATO-s me Beogradin për Luginën e Preshevës.
Duke dënuar me ashpërsinë më të madhe këtë akt terrori të vërtetë të Beogradit ndaj shqiptarëve të Luginës së Preshevës, me synime të qarta destabilizuese, u bëj thirrje shqiptarëve të Preshevës të qëndrojnë të palëkundur në votrat e tyre pavarësisht nga provokacionet e turpshme të Beogradit, që pashmangshëm do të kenë fatin e të gjitha akteve të tyre të verbta, ultranacionaliste të mëparshme!
Shikoni videon e aktit banditesk të terrorit serb. sb
