Nga Boldnews.al
Prokuroria e Përgjithshme, Arta Marku, ka bërë një prapa-kthehu të fuqishme lidhur me pjesëmarrjen në projektin “Forca e Ligjit”.
Ajo duket se është tërhequr nga pakti i nënshkruar me ministrin e Brendshëm, Fatmir Xhafaj, në fillim të muajit Shkurt 2018.
Prokurorja e Përkohshme nuk ka emëruar prokurorët e strukturave të posaçme, të cilët, sipas marrëveshjes, duheshin caktuar brenda 5 ditëve nga firmosja e dokumentit.
Shkak për këtë tërheqje të detyruar mendohet se ka qenë presioni i ekspertëve të atashuar pranë Ambasadës Amerikane në Tiranë.
Këta ekspertë mendojnë se “Forca e Ligjit” zëvendëson Strukturën e Posaçme Anti-Korrupsion, SPAK, krijimi i së cilës po vonohet përtej çdo parashikimi.
“Forca e Ligjit” parashikon hetimin e veprave penale, të cilat janë kompetencë e SPAK. Por, kjo strukturë e posaçme, e krijuar tërësisht me kontributin e partnerëve amerikanë, por rrezikon të mos krijohet për shkak të “kleçkave” dhe vonesave gjatë procesit të Vetingut.
Ekspertët e huaj druhen se, “Forca e Ligjit”, nën kontrollin e Ministrisë së Brendshme, mund të përbëjë shkak që SPAK të mos krijohet.
Për këtë arsye, ekspertët amerikanë duket se kanë zgjedhur që presionin ta ushtrojnë tek Prokurorja e Përgjithshme e Përkohshme, e cila ka pozitë të brishtë për shkak të mënyrës së zgjedhjes në detyrë.
Prokuroritë e rretheve kanë dërguar emrat e prokurorëve kandidatë për strukturat e posaçme të “Forcës së Ligjit”, brenda 5 ditëve nga nënshkrimi i paktit Xhafaj-Marku.
Këto lista janë dorëzuar, në vijim të kërkesë që iu është drejtuar nga ana e Prokurores së Përgjithshme të Përkohshme.
Por, kur ka kaluar më shumë se një muaj, Marku nuk ka caktuar emrat e prokurorëve që do të japin kontributin e tyre në operacionin “Forca e ligjit”. Për më tepër, Drejtoria e Inspektimit në Prokurorinë e Përgjithshme nuk ka kryer as procesin e “mini-vetingut” për këta prokurorë, siç është parashikuar në marrëveshjen Xhafaj-Marku.
Në këtë mënyrë, duket se “Forca e ligjit”, për shkak të kundërshtive të ekspertëve amerikane, do të mbetet thjeshtë dhe vetëm një sipërmarrje policore, pa mbështetjen e partnerëve ndërkombëtarë.
