Nga Boldnews.al
Pas zhurmës që krijoi me shkarkimin e anëtarit të Gjykatës Kushtetuese, Fatos Lulo, Komisioni i Vetingut është tërhequr sërish në “qetësinë” e tij.
Pritshmëria e publikut ndaj punës së këtij Komisioni është shumë e lartë. Opinioni vendas dhe partnerët ndërkombëtarë presin rezultatet e trupës së Vetingut lidhur me integritetin e gjyqtarëve dhe prokurorëve.
Por, përtej deklarimeve publike, Komisioni i Vetingut po e zhvillon procesin e rivlerësimit në një mënyrë shumë të ngadaltë.
Shembulli më konkret ka ndodhur ditën e Hënë, kur plot 12 anëtarë, nga 15 në total që ka Komisioni i Vetingut, zbarkuan në Prokurorinë e Kavajës për të zhvilluar shortin për përzgjedhjen e dosjeve të prokurorëve që do të kalojë në filtrin e integritetit, pasurisë dhe profesionalizmit.
Procesi është zhvilluar me solemnitetin që i takon, por prania e numrit shumë të lartë të komisionerëve është paradoksale, krahasuar me peshën që ka kjo prokurori e vogël.
Ky “angazhim” i tepruar është konstatuar në thuajse të gjithë gjykatat dhe prokuroritë lokale, në të cilat është zhvilluar deri më tani procedura e përzgjedhjes me short.
Në këtë mënyrë, anëtarët e Komisionit të Vetingut, pjesën më madhe të ditëve të muajit e konsumojnë me procedurat burokratike, duke zhvendosur fokusin nga objektivi primar-rivlerësimi i gjyqtarëve dhe prokurorëve.
Komisioni i Vetingut ka nisur punën në Janar të vitit 2018 dhe, pas 3 muajsh, ka arritur në konkluzion vetëm për një gjyqtar, Fatos Lulon. Me këtë ritëm, qytetarët shqiptarë dhe partnerët ndërkombëtarë duhet të presin shumë kohë para se njihen me rezultatet e procesit të shumë-përfolur të Vetingut.
