Presidenti i Turqisë, Rexhep Taip Erdogan tha se do të ishte një gabim i rëndë që Europa ta linte Turqinë jashtë politikës së saj të zgjerimit.
“Do të ishte një gabim i rëndë për Evropën, e cila synon të jetë një forcë globale, ta shtynte Turqinë jashtë politikës së saj të zgjerimit.
Operacionet tona kundër terrorizmit jo vetëm që kontribuojnë në sigurinë tonë dhe të sirianëve por edhe në sigurinë e Europës. Tani ne presim mbështetje të fortë për çështje të ndjeshme si lufta kundër terrorizmit, në vend të kritikave të paqëndrueshme dhe të padrejta”, tha Erdogan gjatë një konference të përbashkët për media në Samitin Turqi-BE në qytetin Varna të Bullgarisë.
Po ashtu, Erdogan tha se Ankaraja është duke shpresuar të fillojë procesi për të rinovuar bashkimin doganor me BE-në.
Presidenti turk u bëri thirrje shteteve të BE-së të bashkëpunojnë për stabilitet dhe mirëqenie në Ballkan dhe rajone të tjera të interesit ndërkombëtar.
“Ejani të punojmë se bashku për mundësimin e stabilitetit dhe mirëqenies në Ballkan, që është rajon gjeografik i përbashkët. Ejani të thellojmë bashkëpunimin në çështje ndërkombëtare si Siria, Iraku, Palestina, Kudsi, Jemeni, Rohingya dhe Afrika. Ejani ta ndërtojmë së bashku Europën si simbol i fortë i lulëzimit dhe stabilitetit”, theksoi ai.
