Nga Boldnews.al
Rreth 24 orë pasi u formalizua “gjoba” për automjetet që kalojnë në Rrugën e Kombit, kryeministri Edi Rama ka dhënë versionin e tij të situatës. Në një komunikim në rrjetin social “Facebook” ai ka replikuar me qytetarët që i janë kundërvënë për aplikimin e tarifës 5-20 euro në aksin më të rëndësishëm rrugor të vendit.
Në versionin e kryeministrit, duhet paguar për qarkullimin, pasi rruga nuk është e përfunduar dhe se mirëmbajtja kushton.
Por ky qëndrim, i njohur tipikisht si “struci”, nuk ka bindur askënd. Prej ditës së dielë, kur nisi tarifimi i Rrugës së Kombit, në adresë të qeverisë shqiptare kanë mbërritur pafundësisht kritika publike. Të menjëhershme kanë qenë reagimet nga qytetarët shqiptarë, bashkëkombasit tanë kosovarë, por edhe eksponentë të lartë politikë në Tiranë dhe Prishtinë.
Për ata që e njohin Edi Ramën, e kanë të qartë se kjo është një prej atyre situatave, në të cilat ai humbet qetësinë. I mësuar me lajkatime publike, të ofruar me shumicë nga pronarët e mediave nën diktatin e tij, Kryeministri shqiptar është gjendur nën një presion, të cilin ndoshta nuk e kishte parashikuar.
Makineria e tij e propagandës, të paktën deri më tani, ka rezultuar e dështuar përsa i përket përballimit të kritikave lidhur me “gjobën” e Rrugës së Kombit.
Establishmenti i tij tentoi që të justifikojë këtë “gjobë” me faktin që propozimi për tarifat e rrugës ka ardhur nga ministrat e LSI-së, kur ata ishin në bashkëqeverisje me Partinë Socialiste. Ky është një argument i pakapërcyeshëm, për faktin se konçensionari ka përfituar kontratën për mirëmbajtjen dhe tarifimin e rrugës nga Këshilli i Ministrave. Pra, një ministër i vetëm, qoftë edhe i LSI, nuk do të mund të vendoste i vetëm këtë “gjobë”.
Mekanizmat e tij të propagandës rikthyen sërish çështjen e mos-përfundimit të Rrugës së Kombit. Dhe, natyrisht, përgjegjësia këtu kërkohet direkt tek qeverisja “Berisha”, e cila zhvilloi këtë rrugë. Por, një asnjë rast, nuk thuhet nga qeveritarët socialist se përse, gjatë 5 viteve të tyre në pushtet, nuk kanë vendosur asnjë metër asfalt në atë rrugë.
Pra, argumentat e propagandës qeveritare kësaj here janë shumë të çalë. Për këtë arsye, është shumë e nevojshme që qeveria të sajojë një “skup” mediatik për të tërhequr vëmendjen.
Do të jetë një sipërmarrje e vështirë, pasi pasojat e tarifës në Rrugën e Kombit do të jenë afat-gjata, nëse qeveria nuk ndërmerr një prapa-kthehu në vendim e saj.
Gjithësesi, derisa të bindet se pagesa në Rrugën e Kombit është e papërballueshme për qytetarët dhe bizneset, zyrat “gëbelsiane” në Kryeministri duhet të shtrydhin aftësitë e tyre për të mbrojtur kryeministrin nga sulmet publike.
