Nga dita e sotme ka filluar testimi i pagesës prej 5-10 euro në “Rrugën e Kombit”. Autoritetet shqiptare kanë vendosur këtë taksë për shoferët që kalojnë në këtë rrugë. Në Kosovë ky vendim është pritur me shumë kritika. Por, a do të vendosë edhe Qeveria e Kosovës taksa për autostradat e veta. Për këtë çështje ka folur për Express ministri i Infrastrukturës, Pal Lekaj
Të paktën dhjetë euro duhet t’i rezervoni për taksën rrugore nëse vendosni të shkoni me veturë nga Kosova në Shqipëri. Kaq para duhet të paguani dy drejtimet nëse kaloni nëpër autostradën e ndërtuar në kohën kur Shqipëria udhëhiqej nga Sali Berisha.
Por, duket se ky nuk do të jetë fundi i pagesave për rrugët që do të shfrytëzohen me makina.
Para, shumë shpejt do të duhet të jepni, edhe për të kaluar në Aatostradat që ka Kosova. Një paralajmërim të tillë e ka dhenë për Gazetën Express vetë ministri i Infrastrukturës, Pal Lekaj.
Mirëpo, ai thotë se kjo gjë do të ndodhë vetëm pasi të jenë matur të gjitha kushtet ekonomike.
“Ne jemi në proces të matjeve për qëndrueshmërinë ekonomike të procesit të pagesës për autostradat në vendin tonë. Shqipëria i ka proceset dhe vendimet e saj dhe ne i kemi tonat. Në kohën e duhur do të marrim vendimet e duhura për këtë çështje”, ka treguar Lekaj.
Ministri i Infrastrukturës ka bërë me dije se të gjitha vendimet do të jenë transparente.
“Ajo çka mund të themi tani për tani është se nuk do të ngutemi për çmimin të cilin do ta parashohim për pagesë. Ky proces do të jetë shumë transparent dhe i hapur për publikun, sepse rrugët bëhen për qytetarët dhe ne jemi të interesuar që ato të mos bëhen barrë për ta por diçka që ju shërben atyre”, ka thënë për Express i pari i MI-së.
Lekaj nuk ka mundur të tregojë se a do të ndodhë brenda këtij viti që autostradat të bëhen më pagesë e apo jo.
Dy autostradat e Kosovës të ndërtuara me buxhetin e vendit kapin një shifër prej mbi një miliard e gjysmë euro pa një ndihmë nga jashtë.
Autostrada Durrës – Kukës – Morinë, që lidh Kosovën më Shqipërinë e quajtur “Ibrahim Rugova”, zyrtarisht thuhet se ka kushtuar mbi 700 milionë euro.
Brenda këtij viti pritet të përfundojë edhe autostrada Prishtinë – Shkup e quajtur “Arbën Xhaferi” me gjatësi prej 55 kilometrash, e që buxhetit të Kosovës do t’i kushtojë 600 milionë euro.
Vënia e taksave për shfrytëzimin e autostradave, do të bëhet për arsye të menaxhimit dhe mirëmbajtjes nga sektori privat.
Deri më tani nuk është bërë e ditur se sa do të mund të paguajnë qytetarët për të kaluar nëpër autostradat e Kosovës.
Kurse, çmimi për “Rrugën e Kombit” sipas të dhënave të publikuara para një viti kur ishin dhënë në koncesion autostradat e Shqipërisë, mjetet me 3 rrota, 2.5 euro. Mjete me 4 rrota 5 euro. Mjetet me 6 rrota, autobusët 11 euro. Mjetet e rënda, kamionët 26 euro dhe mjetet e rënda, kategoria H 23 euro.
