Denis Shtraza është i vetmi i dënuar për rrëmbimin dhe vrasjen e Gazmend Çollakut, ngjarje e ndodhur në qershor 2016 në Durrës.
Miku i tij dhe i bashkë-akuzuari, Ervin Dalipaj, u vra në Prill 2017, gjatë kohës që ishte në kërkim policor. Dy persona të tjerë, të cilët kanë qenë pjesëmarrës në rrëmbim, nuk janë identifikuar.
Policia ka dyshime, ende të paprovuara, se këta dy të paidentifikuar janë pjesë e një grupi të fuqishëm kriminal, anëtarët e të cilit janë aktualisht pas hekurave për vepra të tjera penale.
“Boldnews.al” raporton dinamikën minutë pas minute të rrëmbimit të Gaz Çollakut, në një lokal në qendër të qendër të Durrësit. Disa orë më vonë, ai u gjet i masakruar në anë të rrugës, pranë Fushë-Krujës.
Nga kqyrja e kamerave të sigurisë në lokal “Port Side” që ndodhet në lagjen nr.1, Durrës, vend në të cilën ka ndodhur edhe rrëmbimi rezulton se e gjithë ngjarja ka ndodhur në më pak se 3 minuta.
Gazmend Çollaku, i njohur edhe me emrin Laert, mbërrin në lokalin “Port Side” në orën 18.37, me një mjet tip Mercedez, ngjyrë të bardhë.
Vetëm pak sekonda më vonë, një Audi ngjyrë të errët me portobagazh kalon përballë lokalit. Ndalon për pak çaste dhe personat brenda mjetit sigurohen që Çollaku po zbriste nga makina.
Më pas, Audi i zi kthehet pak pas dhe i bllokon lëvizjen “objektivit”. Menjëherë nga Audi zbresin tre persona, me uniformë me mbishkrimin “Policia” dhe flasin me Çollakun.
Njëri prej autorëve mban në dorë një pistoletë, ndërkohë që dy të tjerët tentojnë të rrëmbejnë Çollakun me forcë drejt makinës.
Në pamje dallohen edhe disa kalimtarë dhe klientë të lokalit, të cilët shfaqin shqetësimin e tyre për atë që po ndodh.
Ngjarja zhvillohet shumë shpejt dhe dy prej autorëve e marrin në makinë Çollakun, ndërsa një i tretë mundohet të qetësojë të pranishmit.
Më pas, edhe ky person u bashkohet autorëve të tjerë në makinë dhe nisen me shpejtësi, me drejtim daljen nga Durrësi.
Mëngjesin e një ditë më pas, Çollaku u gjet i vdekur, i lidhur, në afërsi të rrugës kryesore pranë Fushë-Krujës.
Për këtë ngjarje, u arrestua vetëm Denis Shtraza, për të cilin Policia dhe Prokuroria renditën dy arsye kryesore, në të cilën mbështesnin versionin se Shtraza është i përfshirë në këtë vrasje.
Denis Shtraza dhe Gazmend Çollaku kanë pasur një konflikt të hershëm. Çollaku, në vitin 2013, ka tentuar të vrasë Shtrazën dhe ky i fundit e kishte shprehur hapur se do të hakmerrej.
Denis Shtraza, së bashku me Ervin Dalipaj, janë shoqëruar 3-4 orë pas rrëmbimit. Ata janë gjetur në bordin e mjejti tip Benz Ml, me ngjyre te zeze me targa AA671MZ, në pronësi të Ervinit, ku janë gjetur gjurmë gjaku të njëjta me ato që janë gjetur në vendgjarje dhe në rrobat e viktimës;
Pak ditë më parë, Gjykata për Krime të Rënda e dënoi Denis Shtrazën me burgim të përjetshëm.
