Euro ditën e sotme këmbehet në nivelin e 129 lekëve.në datën 15 mars të këtij viti ishte me 131.5 lekë, ndërsa në janar me 133.
Sipas, Gjergj Buxhukut, shkaqet e forcimit të papritur të monedhës vendase lidhen me qarkullimin e madh në treg të Euros dhe kryesisht paratë informale, përsa kohë që edhe bilancet tregtare nuk kanë pasur ndryshime të dukshme të trendit të tyre.
“Janë të interesuar që këto para, që natyrisht janë valutë, kryesisht Euro dhe Dollarë, t’i rihedhin në investime të llojit tjetër.
Perceptimi të rritjes së presionit ndërkombëtar dhe institucioneve ndërkombëtare të qarkullimit të parave dhe transaksioneve nga vende si Shqipëria, po ndodh procesi i riatdhesimit të parave, të cilat shqiptarët i kanë pasur jashtë, kryesisht në parajsat fiskale” .
Por Leku është duke u forcuar edhe përballë Dollarit. Monedha amerikane po ashtu është dobësuar me shpejtësi duke u këmbyer me 105 lekë. Buxhuku e lidh këtë dukuri me tërheqjen e parave nga vendet e njohura si ‘parajsa fiskale’, për shkak të frikës që kanë shumë biznese për zbulimin e identitetit.
Ekspertët e ekonomisë nuk përjashtojnë as dukurinë e ndërhyrjes spekulative në kursin e këmbimit nga kompani me kapital të huaj, të cilave iu intereson një Euro e dobët, për të blerë këtë monedhë në treg në kushtet kur mbyllin bilancet vjetore.
