Nga boldnews.al
Komisioni i Vetingut ka nisur punën e tij në mënyrën më të keqe të mundshme. Ky komision, i cili është më i rëndësishmi në procesin e Reformës në Drejtësi, është përfshirë në një show pa kripë, duke referuar material në Prokurori
pa kryer verifikimet e plota. Komisioni i Pavarur i Kualifikimit njoftoi të hënën se ka referuar në Prokurori të gjithë dokumentacionin që rezultoi nga hetimi administrativ gjatë procesit të Vetingut të ish-gjyqtarit të Gjykatës Kushtetuese, zotit Besnik Imeraj.
Ky njoftim u lexua nga pjesa më e madhe e medias nën kontrollin qeveritar si kapje e një “peshku të madh”. Në fakt, situata duket vetëm një lloj propagande, e cila iu hodh publikut të etur për penalizimin e gjyqtarëve dhe prokurorëve. Komisioni i Vetingut deklaron vetë publikisht në dt. 20 Mars 2018 se “…ka referuar të gjithë dokumentacionin që rezultoi nga hetimi administrativ…”.
Por, vetë ky komision, më 12 shkurt 2018 njoftoi se “…ka vendosur ndërprerjen e procedurave të rivlerësimit për subjektin e rivlerësimit Besnik Imeraj..”, për shkak se ai dha dorëheqjen nga pozicioni i anëtarit të Gjykatës Kushtetuese.
Pra, në dy njoftime publike brenda pak javësh, Komisioni i Vetingut fillimisht njofton për ndërprerjen e procesit dhe, pas më shumë se një muaji, njofton se ka referuar materialin e plotë në Prokurori për rezultatet e hetimit administrative.
Vetëm duke lexuar njoftimet publike të Komisionit të Vetingut, kuptohet qartë se referimi i materialeve në Prokurori për ish-gjyqtarin Imeraj është një lëvizje e sforcuar prej trupës verifikuese.
Aktualisht, ende nuk janë publike detajet e materialit referuar ndaj ish-gjyqtarit. Por, duket e pamundur që Komisioni i Vetingut, pa kryer një hetim të plotë, pasi vetë njoftoi ndërprerjen e procedurave, të ketë arritur në konkluzione përfundimtare për shkelje të ligjit “Për rivlerësimin kalimtar të gjyqtarëve dhe prokurorëve…”.
Në këtë situatë, nuk duhet anashkaluar edhe qëndrimi publik i vetë ish-gjyqtarit Besnik Imeraj, pas njoftimit të Komisionit të Vetingut për referimin e materialeve ndaj tij në prokurori.
Në një prononcim për “Ora News”, Imeraj u shpreh se: “Padia penale është politike, nuk ka asnjë bazë kushtetuese dhe ligjore. Që kur Edi Rama dhe Qeveria po bëjnë kontrollin e gjyqtarëve gjithcka është e qartë. Unë nuk kam asnjë problem me ligjin”.
