Banka Botërore ka publikuar raportin e fundit për tendencat e punësimit, që merr në analizë treguesit në Ballkanin Perëndimor dhe disa vende të rajonit, që janë pjesë e BE-së në periudhën 2016-2017. Raporti sjell të dhëna interesante, që marrin një kontekst tjetër kur krahasohen në raport me rajonin dhe një prej tyre, është pjesa e pagave të ulëta dhe përqendrimit të kësaj page në ekonomi. Sipas raportit, përqendrimi i lartë i pagave të ulëta është udhëheqësi kryesor i pabarazisë së pagave në përgjithësi në rajon. “Mali i Zi dhe Bosnjë-Hercegovina raportojnë nivelin më të lartë të pagave, kurse Shqipëria më të ulëtën”, – vlerëson raporti.
Një e dhënë tjetër interesante është edhe ajo e strukturës së punësimit tek popullsia në moshë pune. Sipas raportit, Shqipëria mban rekordin e atyre që janë të vetëpunësuar, por që kanë nivel arsimimi 8-vjeçar. Kur në rajon pjesën më të madhe të të vetëpunësuarve e zënë ata që kanë arsim të mesëm.
Kurse punësimin më të lartë në sektorin privat, Shqipëria e raportoi në segmentin e atyre me arsim të lartë.
“Në mesatare, rreth gjysma e të vetëpunësuarve në Ballkanin Perëndimor ishin me shkollë të mesme. Në Bosnjë-Hercegovinë dhe Kosovë, më shumë se 60% kishin një nivel arsimimi mesatar në 2016, më pak të arsimuarit ishin grupi i dytë më i madh mes të vetëpunësuarve kurse ata me arsim të lartë zinin rreth 11%, në një mesatare. Në kontrast me këtë, në Shqipëri dhe Maqedoni, shumica e të vetëpunësuarve ishin ata me nivel më të ulët arsimimi.
Në termat e edukimit në total, punësimi u rrit në të gjitha grupet e edukimit, por më së shumti tek ata me arsim të mesëm në të gjitha vendet, me përjashtim të Shqipërisë. Kjo e fundit raportoi rritjen më të madhe të punësimit në segmentin e atyre me arsim të lartë”, thuhet në raport.
Punësimi part-time
Ky lloj punësimi, sipas Bankës Botërore, ishte më pak i përhapur në vendet e Ballkanit Perëndimor duke zënë 11% në vitin 2017. “Shqipëria ishte e vetmja që raportoi një shifër të lartë edhe pse me tendencë tkurrjeje për të punësuarit part-time, që zënë 20% të punësimit total. Serbia dhe Bosnjë-Hercegovina renditen më pas me 10.6% dhe 9%. Në vendet e tjera të rajonit punësimi part-time ishte 5-6%. Kjo është e njëjtë me vendet e tjera pjesë e BE-së që i janë bashkuar këtij komuniteti mes 2004-2013” thuhet në raport.
Emigrimi njeh një tjetër kulm
Vendet e Ballkanit Perëndimor po vuajnë nga largimi i trurit pasi pjesa që po emigron është pikërisht pjesa me arsim të lartë. BB vëren se është rritur pjesa e popullsisë që ka emigruar në raport me popullsinë totale, një raport që po thellohet duke zënë më shumë se 30%. Saktësisht Shqipëria është e dyta në këtë renditje me 1.05 milionë emigrantë. /Monitor.al/
