E ardhmja e Cristiano Ronaldo-s përflitet gjithnjë e më fort se do të jetë në Kinë, nëse ai do të largohet nga Real Madridi.
Këto zëra i ka përforcuar edhe më shumë ish trajneri i Brazilit, Luis Felipe Scolari i cili rrëfeu një bisedë të bërë me yllin portugez.
Scolari dhe Ronaldo ishin dy ndër figurat më të rëndësishme të botës së futbollit që morën pjesë në “Quina Awards” në Lisbonë, në ceremoninë e çmimeve vjetore të dhëna nga Federata Portugeze e Futbollit. Aktualisht Scolari është trajner tek ekipi kinez i Guangzhou Evergrande-s.
Ai zbuloi se nga ana e sulmuesit të “Galaktikëve” ka pasur interesim për jetesën në shtetin më të fuqishëm në Azi.
“Ai më ka pyetur më shumë se një herë se si është jeta në Kinë. Përse Cristiano Ronaldo nuk mund të shkojë në Kinë? Është e vërtetë që më pyeti dhe unë i tregova detaje. Duhet të kuptojmë që CR7 mbështetet nga sponsorë, ka një industri të tërë pas. Kina është shteti më i madh i botës. Më pas, unë i thashë atij, çfarë gjithnjë i them: cilido e ka këtë mundësi, duhet që të shkojë në Kinë”, deklaroi tekniku brazilian.
Ndërsa mediat kanë shkruar për largimin e CR7-ës nga Madridi, më të interesuara për shërbimet e tij kanë qenë klubet kineze, të cilat janë të gatshme që të bëjnë çmenduria për ta pasur atë në skuadër.
Në ceremoninë e djeshme, Ronaldo fitoi çmimin e futbollistit më të mirë nga federata portugeze. Jose Mourinho fitoi çmimin “Vasco da Gama” për shpërndarjen dhe rritjen popullaritetit të futbollit portugez.
