Ka nisur me përplasje të forta mbledhja e parë e komisionit hetimor për Saimir Tahirin ka nisur sot punën. Ka qenë kreu i këtij komisioni, deputeti i PD-së, Edi Paloka, ai i cili ka hapur mbledhjen, duke njoftuar nga ana tjetër edhe zgjedhjen e sekretares së komisionit.
“Maxhoranca besoj se e ka gati kandidaturën për sekretarin e komisionit”, u shpreh Paloka. Ndërkohë që pas tij fjalën e ka marrë deputetja e PS-së, Felaj, e cila ka deklaruar: “Në mbledhjen e parë të komisionit, ligji e përcakton qartë se çfarë bëhet, kryetari deklaron qëllimin e ngritjes, detyrat e komisionit dhe planin paraprak të hetimit. Hetimi nuk mund të hapet që sot, se duam të dëgjojmë planin paraprak të hetimit dhe pastaj rezervojmë të drejtën të shprehemi”.
Pas propozimit të emrit të Klotilda Ferhatit si sekretare nga deputeti Sterkaj, u kalua më pas në votim.
Ndërkaq, kjo mbledhje u shoqërua me debat sa i përket asaj të radhës. Partia Socialiste ka kërkuar që mbledhja e radhës të bëhet të hënën e ardhshme, por PD nuk ka qenë dakord.
“Rregullorja është standarde, mund të ketë ligji nevojë për rishikim, por nuk e kemi ne tagrin për këtë. Rregullorja nuk kërkon kohë, po plani paraprak i hetimit ka nevoje për kohë, propozoj që të vendosim dy ditë në javë, që të mos kemi mundësi jo ishim, jo nuk ishim. Të hënave të çdo jave të bëjmë mbledhjet e komisionit”, – tha demokrati Flamur Noka.
Mirëpo, me afatin një jave nuk ka qenë dakord as kryetari Paloka. ‘Nuk e shoh te arsyeshme, sinqerisht, një javë për të diskutuar, nuk dua të paragjykoj asgjë, as qëllimin e kërkesës për ta shtyrë një jave”, – tha Paloka.
Pas tij, fjalën e ka marrë Fino, i cili u shpreh se jemi të barabartë. “E para, s’ke si na paragjykon se jemi të barabartë. Duam kohë të shohim rregulloren, komisionet e shkuara kanë kaluar edhe tri javë, por unë nuk them tri javë. Ne duam ta mbyllim sa më shpejt, edhe tre muaj po pati mundësi. Koment të diskutimit tim nuk duhet të bëni”.
Menjëherë ka marrë fjalën Paloka, i cili tha: S’jam këtu të zbatoj porositë e tua, jam kryetar i komisionit për të hetuar një çështje, s’kam dëshirë tu bëj koment, s’ma jep ti të drejtën e fjalës mua se e kam fituar në ‘90”.
