Ndërsa u trumbetua si sukses heqja e taksave për hotelet dhe rezortet e luksit, paratë e munguara është menduar që ty merren qytetarëve dhe biznesit të vogël. Data 1 prill nuk do jetë “ditë rrenash”, pasi nga ajo ditë dhe në vijim do të hyjnë në fuqi taksat e reja, që nënkuptojnë rritje të tyre, duke rënduar më së shumti qytetarët.
Më rëndë e pëson Tirana, taksat e rritura të së cilës do të shkojnë në arkën e bashkisë. Tashmë përveç shtrenjtimit të ujit të pijshëm, “surpriza” që u vjen banorëve të kryeqytetit është edhe taksa e banesës. Për të “shmangur” reagimet masive, qeveria ka menduar që nga skema e re të përjashtohen kryefamiljarët pensionistë dhe personat që trajtohen me përkrahje sociale. Qytetarët do e ndjejnë shtimin e taksës në faturat e ardhëshme të ujit ose energjisë. Akoma më rëndë do e pësojnë bizneset e vogla.
Çdo dyqan do të paguajë një taksë vjetore prej 0.2 për qind të vlerës së ndërtesës. Më parë taksa ishte fikse 400 lekë/m2 në vit për zonën Tiranë-Durrës, 300 lekë/m2 në vit për Vlorën, Fierin, Sarandën, Pogradecin, Korçën, Elbasanin, Beratin, Lushnjen, Gjirokastrën, Shkodrën, Kavajën dhe Lezhën, kurse për bashkitë e tjera taksa ishte 200 lekë/metri kator në vit. Qeveria ka publikuar çmimet mesatare të referencës për secilën bashki, e ashtu si me banesat, kryesojnë me nivelin e taksës Tirana dhe Durrësi. Formula e re parashikon që taksa e ndërtesës për familjarët do të jetë 0.05% e vlerës së banesës, pra nëse një shtëpi ka një vlerë prej 10 milionë lekësh, qytetari duhet të paguajë në muaj 500 lekë, që përkon me 0.05 përqin-dëshin, ndërsa për bizneset kjo taksë do të jetë 0.15%. Familjarët do të paguajnë deri në 60 mijë lekë të vjetra në vit taksë banese.
Ndërkohë, çmimet e referencës për Tiranën variojnë nga 60 mijë lekë për m2 deri në 190 mijë lekë për m2. Rritje të çmimit fiskal për shitblerjen e apartamenteve është shënuar në Rrugën Bardhyl, “Xhamlliku”, “Profarma”, rruga “Kongresi i Manastirit” dhe bulevardi “Zhan Dark”. Qeveria ka shtrenjtuar edhe çmimet e shitblerjeve të apartamenteve për Rrugën e Durrësit. Në tabelë kjo përkon me zonën kadastrale 3/1, ku çmimi më parë ishte 75 mijë lekë për metër katror, ndërsa sot bëhet 77 mijë lekë për metër katror, me një rritje prej 2 mijë lekësh për metër katror. Krahasuar me formulën e taksës së vjetër kemi të bëjmë me rritje të taksës së ndërtesës për dyqanet në të gjithë vendin. Duke marrë si shembull një dyqan që ka një vlerë prej 100 mijë eurosh, me formulën e re taksa shkon në 200 euro në vit. E njëjta mënyrë taksimi vlen për të gjitha dyqanet në të gjithë vendin. Në këtë trend dhe nëse do të ketë reagim, nuk është çudi që kryebashkiaku i Tiranës Erion Veliaj (Lali Eri), me lopatë në duar të dalë publikisht duke “argumentuar” se nuk është shumë kjo taksë, pasi i bie vetëm një kafe në ditë…
