Ish ministri i Brendshëm Saimir Tahiri vijon të shfaqë ‘muskujt’ ndaj kryeministrit Edi Rama, duke treguar se ka mbështetësit e tij.
Pranë banesës së ish ministrit te “Kodra e Diellit”, janë mbledhur simpatizantë të Tahirit, në shenjë solidariteti me ish kreun e Ministrisë së Brendshme, për të cilin Prokuroria për Krime të Rënda ka kërkuar arrestimin.
Më herët Prokuroria njoftoi: Prokuroria për Krime të Rënda kërkon nga Kuvendi i Shqipërisë autorizimin për heqjen e imunitetit të deputetit Saimir Tahiri, në vijim të një hetimi të nisur për veprat penale të “Trafikut të narkotikëve”, kryer në bashkëpunim, në formën e posaçme të grupit të strukturuar kriminal dhe “Korrupsionit pasiv të zyrtarë të lartë shtetërore dhe të zgjedhurve vendorë”, parashikuara nga nenet 283/a/2 dhe 260 të Kodit Penal.
Prokuroria për Krime të Rënda po zhvillon hetime, në bashkëpunim me autoritetet italiane, për një grup kriminal, i cili ka trafikuar sasi të mëdha lënde narkotike kanabis sattiva nga Shqipëria në drejtim të Italisë. Në bazë të të dhënave të përftuara në kuadër të këtij hetimi, Prokuroria për Krime të Rënda kërkon nga Komisioni i Mandateve në Kuvendin e Shqipërisë dhënien e autorizimit për “arrestimin, heqjen e lirisë dhe kontrollin personal e të banesës” për deputetin Saimir Tahiri.
