Ministria e Jashtme greke ka shprehur sërish shqetësimin e saj lidhur me vendimin e qeverisë për prishjen e objekteve në zonën e Himarës.
Në një komunikatë për shtyp të lëshuar mbasditen e së enjtes, Athina zyrtare akuzon Tiranën se tenton të tërheqë vëmendjen e opinionit mbas skandalit të drogës, ku implikohet një i afërm i një ish-ministri të afërt me kryeministrin Rama, siç theksohet në komunikatë.
“Me shqetësim të madh ndjekim lidhjet e mundshme të arenës politike shqiptare me krimin e organzuar, siç duket nga arrestimi i para pak ditëve të kreut të një organziate të trafikut ndërkombëtar të drogës, i cili “rastësisht” është i afërt me një ish-ministër të rëndësishëm të qeverisë Rama”, thuhet në komunikatë.
Gjithashtu, për Athinën shqetësues është fakti që qeveria shqiptare vazhdon të marrë masa për prishjen e pronave të anëtarëve të minoritetit grek në kuadër të politikës së saj të çrrënjosjes së pranisë historike të prezencës së minoritetit grek në zonën e Himarës.
Sipas qeverisë helene, vendimi i djeshëm i autoriteteve shqiptare vërteton se ligji i votuar rishtaz nga Parlamenti shqiptar për minoritetet perben një hap mbrapa për minoritetin më të madh të Shqipërisë.
“Ndërkohë që shume prej nesh e lidhinin këtë vendim me tentativën e qeverisë për të tërhequr vëmendjen e opinionit publik nga çështja e rëndësishme që ka lindur nga tregtia e narkotikëve. Shpresojmë të mos jetë kështu”, përfundon deklarata e Ministrisë së Jashtme greke.
