Kryeministri Edi Rama ka reaguar pas tryezës së opozitës për krijimin e frontit që do të kërkojë largimin e kryeministrit Rama dhe krijimin e një qeveria antimafia.
Në një status në FB, kreu i qeverisë ironizon krijimin e Frontit opozitar, duke e konsideruar si Frontin e Çadrës së vjetër.
“Asgjë e re nga fronti i vjetër, përveç faktit që sot nuk janë më ca në çadër e ca me çadrën, po janë të gjithë brenda në çadër, me po ato maska që as skuqen as zverdhen kur i marrin shqiptarët për budallenj; me po atë paaftësi për të marrë përgjegjësi mbi vete, për katandisjen e institucionit të opozitës në një sharëtore publike; me po atë hipokrizi të skajshme të tërë këtyre viteve, si në pushtet e si në opozitë, ku vazhdojnë me po atë këngë të vjetër, të cilën e dëgjojnë vetëm shurdhët me veshët në rregull!”, shkruan Rama në FB.
Rama thotë se çështjen për të cilën akuzohet i përfshirë edhe ish-ministri Tahiri thotë se atë e ka në dorë drejtësia.
“Sot, kur e tërë opozita me kuç e me maç, u zhyt si front në çorbën e dy kriminelëve të arrestuar në Itali, është dita të kujtojmë se në 20 vitet e fundit, ka patur plot raste kur politikanë, deputetë e familjarë të tyre janë përfshirë në akuza publike. Disa herë akuzat kanë dalë të vërteta, disa herë jo. Por, ndryshe nga paraardhësi im, nuk mund të jem unë ai që përcakton fajin apo pafajësinë.
Kjo është detyrë e sistemit të drejtësisë dhe është drejtësia që duhet të zbardhë deri në fund të vërtetën. Paraardhësi im në qeveri e çoi Shqipërinë buzë greminës vetëm e vetëm për të mbrojtur djalin dhe vajzën e tij” vijon Rama.
Ai garantoi se qeveria është e vendosur për të luftuar krimin dhe kriminelët.
