Një ditë para zgjedhjeve për kryetarin e ri të Partisë Demokratike, kritika për garën brenda PD-së mes Bashës dhe Selamit vijnë edhe nga përtej Atlantikut.
Zëri i Amerikës i kushton një kronikë të zgjeruar zhvillimeve brenda të djathtëve, teks shfaqet me shumë nota kritike ndaj Lulzim Bashës, kryetarit të ‘vetëngrirë’, që kërkon një mandat të dytë.
Zëri i Amerikës i kujton Bashës mënyrën se si u zhvillua fushata, sipas tyre aspak demokratike, pasi mediat nuk u lejuan në asnjë takim, por u servirën pamje të përzgjedhura nga stafi i tij.
“Fushata e zotit Basha u zhvillua e mbyllur, dhe për publikun u servirën vetëm pamjet dhe deklaratat e përzgjedhura nga stafi i tij. Mediat asnjëherë nuk u pranuan të ndiqnin takimet dhe as ato pak raste debati që zhvilloi me rivalin tjetër në garë Selami, pas kërkesës së këtij të fundit”, thotë Zëri i Amerikës.
Më tej përmendet fakti se Basha ka deklaruar se do të marrë përsipër të gjitha përgjegjësitë e humbjes së 25 qershorit, por ‘dhe gjatë vazhdimit të fushatës nuk u mësua se cilat ishin këto përgjegjësi dhe gabime’, thotë Zëri i Amerikës.
Në fund të kronikës Zëri i Amerikës thekson se në rast fitoreje, Lulzim Basha rrezikon të ketë frenat e një partie të përçarë si kurrë më parë. Kredencialet e Bashës me Washingtonin u dobësuan jo pak gjatë kohës kur po tentohej të kalohej në Kuvend reforma në drejtësi.
Në mënyrë të përsëritur ambasada amerikane në Tiranë doli me deklarata kundër PD-së dhe lidershipit të saj se po pengonin reformën në drejtësi.
