Disa ditë më parë, presidenti i zgjedhur Ilir Meta bëri një deklaratë të fortë, duke thënë se nuk do të dekretonte asnjë ministër apo kryeministër që do të ishte produkt i votave të vjedhura.
Menjëherë pas kësaj deklarate pati reagime nga përfaqësues të PS-së, ku e cilësuan si kërcënim të ngjashëm me atë të presidentit të Maqedonisë George Ivanov, i cili refuzoi të jepte mandatin liderit të opozitës për të krijuar qeverinë.
Por, më i ashpër ishte kreu i grupit parlamentar të PS-së, Gramoz Ruçi, ku një ditë më parë u shpreh së nëse Meta do të ndërmerrte këtë veprim atëherë do ta shkarkonin.
Lidhur me deklaratën e Rucit, ditën e sotme është shprehu ish-ministri i Drejtësisë Ylli Manjani, ku përmes një statusi në Twitter e sheh të pamundur shkarkimin e Metës.
‘Nuk e di për Kushtetutën e Fierit, por ajo e Shqipërisë thotë: Shkarkimi i Presidentit të Republikës vendoset nga 93 deputetë”, -shkruan Manjani me ironi.
Në fakt, më qartë se deklaratat e palëve politike është vetë Kushtetuta, e cila e ka përcaktuar të bardhë mbi të zezë se kur mund të shkarkohet Presidenti i Republikës.
Në nenin 90 të Kushtetutës së Shqipërisë, ku flitet për shkarkimin e Presidentit, pika 1 thotë se ‘Presidenti i Republikës nuk ka përgjegjësi për aktet e kryera në ushtrim të detyrës së tij”.
Ndërsa pika dy e këtij neni thotë se Presidenti i Republikës mund të shkarkohet gjithashtu për shkelje të rëndë të Kushtetutës dhe për kryerjen e një krimi të rëndë.
Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij.
Por, edhe nëse kalohet në Kuvend, vendimi i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra ose në rast të kundërt shpall vendimin e Kuvendit të pavlefshëm.
Deklaratat e Rucit duken jo vetëm të nxituar, por edhe të pamenduara mirë dhe të pabazuar në ligj, shto këtu edhe vetë faktin që Meta akoma nuk është betuar si President, moment ky kur mund të diskutohen edhe veprimet e tij në rolin e Kreut të Shtetit.
