I gjendur në një nga javët më të vështira të qeverisjes së tij, Edi Rama, sot në monologun e përjavshëm në Facebook u detyrua të qetësojë mbështetësit e tij se ai nuk do të tradhëtojë vullnetin e tyre. Heqja pa ndo0një shkak qenësor e 4 ministrave, përligjia katastrofike dhe aspak bindëse që i bëri ndryshimeve në kabinet, çadra e opozitës dhe goditjet e herpashershme pas shpine të LSI-së e kanë cfilitur imazhin e kryeministrit. Frika gjithashtu se vendi i Ministrit të Brendëshëm mund të mbetet bosh e kanë shtyrë Edi Ramën të veshë një maskë force. Ai doli këtë të dielë pasdite për të thënë dy gjëra: “qeveri teknike nuk do të ketë dhe zgjedhjet nuk do të shtyhen”. Madje për t’i bindur idhtarët e tij se këto janë të vërteta ai vuri bast se opozita ashtu siç votoi me pahir reformën në drejtësi, po ashtu do të futet edhe në zgjedhje. Ai u tregua më optimist se duhet kur tha se shpresonte se PD do shkonte në parlament dhe do ta votonte vettingun (shiko videon poshtë).
Kjo qe pjesa më e rëndësishme e monologut të sotëm të Ramës. Pjesa tjetër ishin anatemimet e zakonshme, për partitë e vogla politike, për gjyqtarët, për gazetarët e analistët, për portalet dhe banakët televizivë. Si gjithnjë Rama u mundua të vërë kufirin absurd se ai dhe ata që e mbështesin janë në krahun e së mirës, ndërsa të gjithë të tjerët në anën e atyre që nuk e duan Shqipërinë.
Por e reja e monologut të sotëm qe pikërisht përpjekja për t’u treguar i fortë. Për t’iu dhënë zemër të vetëve se ai nuk ka ndërmend të tërhiqet pikërisht në momentin kur edhe ndërkombëtarët edhe vetë socialistët po fillojnë të përmendin fjalën krizë. Rama, të cilin e kanë akuzuar ditët e fundit për dalje publike të çoroditura, për lëvizje kaotike dhe veprime të pashpjegueshme, sot kishte për qëllim të siguronte. Ai lëshoi mesazhet se megjithë vështirësitë nuk do tërhiqet as për qeverinë dhe as për zgjedhjet duke dashur të mbajë me optizmizëm skalionet e të vetve.
