Një grua ka rrëfyer sot në emisionin “E Diela Shqiptare” se për shkak të një zakoni në fshatin e Tropojës ku edhe u lind, babai nuk i flet me gojë prej 15 vitesh, vetëm se ajo vendosi të zgjedhë vetë burrin me të cilin do të ndante jetën.
“Unë kam 15 vite që jam martuar dhe nuk shkoj tek familja sepse kam marrë burrin me dëshirën time dhe familja ime nuk e donte. Ne kemi qenë komshinj, pra jemi lindur dhe rritur aty dhe mbajmë të njëjtin mbiemër. Arsyeja që babait tim nuk ka pëlqyer kjo lidhje e imja është se jemi rritur në një vend, pasi tradita e zonës së Tropojës kështu e ka” tha ajo.
Vitoria ka ndarë me publikun historinë e dashurisë me bashkëshortin, me të cilin u rrëmbye dhe nisi një jetë të re në kryeqytet.
Ata nga martesa kanë edhe një djalë. Kurse lidhur me nënën e saj, Vitoria thotë se atë e ka takuar fshehurazi të atit.
“E kam takuar në qytet në Bajram Curri, fshehurazi babit. Ajo më pranoi për këtë lidhje, por kishte frikë babin”, vijon ajo.
