Mediat ndërkombëtare kanë pasqyruar lajmin e kallëzimit penal të policisë ndaj kreut të PD, Lulzim Basha.
Në artikullin e saj “Associated Press” shkruan se policia ka kallëzuar Bashën për thirrje për dhunë, duke cituar thirrjet e Bashës për thyerje xhamash e çarje gomash.
Kreu i PD-së i ka bërë thirrje popullit që të mos rrijnë si “delet” por të “luftojnë mbrapshtë”, por pavarësisht thirrjeve, protesta e opozitës nuk ka çeduar në dhunë, shkruan “AP”.
Në shkrim përmenden edhe ngjarjet e mëparshme në vend, si bojkoti i parlamentit nga ana e opozitës, vonesat për procesin e vettingut, apo thirrjet e ndërkombëtarëve për t’u kthyer në Kuvend.
Opozita shqiptare i druhet korruptimit të prokurorëve dhe gjykatësve të ardhshëm që pritet të zgjidhen nga reforma në drejtësi, duke kujtuar vështirësitë që ka hasur Shqipëria në vite që pas rënies së diktaturës komuniste. Pavarësisht kërkesave të ndërkombëtarëve, e djathta nuk duket se do të kthehet në Parlament pa iu plotësuar kushti i zgjedhjeve të lira dhe të ndershme, nëpërmjet qeverisë teknike, shkruan “AP”.
Shkrimi është pasqyruar edhe nga “New York Times” dhe “Deutsche Welle”.
