Gjykata e Krimeve të Rënda, në seancën për 9 të pandehurit e grupit të Xibrakës, rrëzoi kërkesën e akuzës dhe të pandehurve për gjykim të shkurtuar.
Mësohet se avokati i Klement Dalipit, Ardian Visha, u largua nga seanca dhe kërkoi përjashtimin e trupit gjykues.
Pas sinjalizimit prej autoriteteve gjermane, në fillim të muajit janar të vitit 2015, policia shqiptare ndërmori një operacion masiv që çoi në gjetjen e laboratorit të fshehur në një ish-magazinë ushtarake dhe prangosjen e 8 personave, dy prej të cilëve shtetas kolumbianë.
Rezultoi se droga mbërrinte në Shqipëri nga vendet e Amerikës Latine e përzier me vaj palme dhe, në laboratorin e drogës në Labinot, bëhej ndarja e saj. Më pas droga kishte si destinacion vendet e Europës.
