Mandati i deputetit të PS së Lezhës, Armando Prenga ishte një nga çështjet kryesore të mbledhjes së sotme në Komisionin Qendror të Zgjedhjeve.
Pas diskutimeve, KQZ me 4 vota pro dhe 3 kundër vendosi të kërkojë më shumë informacion nga prokuroria për kohën kur është dënuar Armando Prenga në Itali.
Avokati i Prengës tha se deputeti ka dhënë një ditë më parë shenjat e gishtave në departamentin përkatës dhe është i hapur ndaj cdo informacioni apo procesi. Avokati shtoi se për këtë çështje ata disponojnë vetëm një kërkesë, e cila i është paraqitur edhe KQZ, por jo dokumentacionin përkatës, çka i pengon ata të bëjnë një mbrojtje ligjore dhe efektive.
Lidhur me këtë çështje, sipas avokatit, i janë drejtuar edhe Prokurorisë, pasi sipas tyre ka patur tentativë për të mbledhur të dhëna në mënyrë që të dëmtohet figura e klientit të tij.
“Me gjithë rezervat që kemi lidhur me këtë njoftim të dhënë edhe nëpër portale, para pak ditësh në jemi njohur zyrtarisht vetëm nëpërmjet administratës të KQZ, dhe nuk disponojmë asnjë dokumentacion për këtë çështje. Ne disponojmë vetëm një kërkesë që e kemi edhe ju. Dhe nisur nga kjo nuk kemi një mundësi për të kërkuar të drejtën. Kemi dorëzuar edhe kërkesë në Prokurori, por tha u dha përgjigje se në kuadër të dekriminalizmit, provat përbëjnë sekret dhe nuk mund të bëhen publike”, tha avokati.
Madje ai theksoi se “për vendimin e vitit 2005 në Itali, Prenga nuk kishte dijeni”.
