Avokati Spartak Ngjela ka listuar arsyet që sipas tij qëndrojnë pas faktit se përse Ilir Meta nuk iu bashkua protestës së opozitës.
Duke shkruar në rrjetet sociale, Ngjela shprehet se Meta është më rëndë nga të gjithë vjedhësit që kanë futur kokën në çadër, por e kuptoi që kjo nuk ishte rruga e shpëtimit.
Meta e kuptoi që koka e tij ishte më e madhe se çadra e Saliut, thotë Ngjela.
Ja reagimi i plotë i Ngjeles:
A do të hyjnë në Parlament për të përfunduar vetingun antikorrupsion forcat proamerikane të opozitës? Unë mendoj se do të hyjnë. Në fakt kjo do të varet nga aktiviteti i ambasadorit amerikan, Donald Lu. A do të hapet kutia hermetike njëzet e pesë vjeçare – korrupsioni dhe vjedhja e pushtetarëve Sali e kompani?
Unë mendoj se shpejt do të hapet dhe gjithçka do të dalë në dritë, sepse kjo është në fakt çadra që kanë ngritur vjedhësit në Bulevard. Gjithçka është kuptuar nga shqiptarët: ajo çadër kërkon të bëhet muri mbrojtës kundër identifikimit ligjor dhe ndëshkimit të korrupsionit shqiptar.
Nuk iu përgjigj njeri, veç atyre që kanë frikë nga vetingu dhe hetimi. Por nuk kanë asnjë shpresë: i pari i la Meta. Pse nuk iu bashkua Meta çadrës, kur çunaku Basha e priste me padurim? Sepse e pa që vjedhësit nuk kishin forcë. Por edhe se e pa që do të goditej fort nga Uashingtoni.
Meta është më rëndë nga të gjithë vjedhësit që kanë futur kokën në çadër, por e kuptoi që nuk ishte ajo rruga e shpëtimit. Koka e Metës ishte më e madhe se çadra e Saliut. Të paktën këtë e kuptoi.
Por, a do të ketë një zgjidhje për vetingun. Po, ka një zgjidhje: duhet të shkojnë edhe këtë herë në Parlament forcat proamerikane të Grupit Parlamentar të Partisë Demokratike, dhe të gjithë proamerikanët e opozitës.
