Kryeministri Edi Rama ka pranuar njërin kusht të opozitës për zgjedhje të lira.
Rama sot sërish nga foltorja e Parlamentit, ka akuzuar opozitën se ka hyrë në çadrën e protestës për të bllokuar vettingun, qe sipas shefit te qeverise është kushti i vetëm për të hapur negociatat me BE-në.
“KE ka thënë copë, Këshilli i Europës po ashtu, ‘vettingu, asnjë gjë tjetër’. Dhe nuk kanë thënë mbarojeni, por filloni vettingun”, tha Rama. Në fund të fjalës së tij në Parlament, Rama e ftoi opozitën në dialog për standardet e zgjedhjeve të qershorit.
“Nuk di asnjë mënyrë tjetër se si mund të përmirësohen standardet e zgjedhjeve, kur ti nuk ulesh në tryezë për t’i përmirësuar”, u shpreh ai. Teksa për herë të parë tha se numërimi elektronik është i mundur.
“Numërimi elektronik është i mundur të bëhet. Patjetër që është i mundur dhe ne s’kemi asnjë problem. Por numërimin elektronik e kompenson qind për qind hapja e kutive sido që të vijë puna”, shtoi Rama
