Kreu i Kuvendit, njëherësh edhe kryetari i LSI-së, Ilir Meta dha sot detaje se për çfarë bisedoi në darkën që u zhvillua në godinën e Kryeministrisë, ditën e djeshme me shefin e qeverisë, Edi Ramën.
Meta, duke folur për gazetarët nga Kryesia e Kuvendit, tha se në darkën me Edi Ramën biseduan për Reformën në Drejtësi.
Sipas kryeparlamentarit, darka e mbrëmshme ishte planifikuar më herët.
“Komunikimi është i vazhdueshëm, normal, bashkëpunues…Diskutuam për reformën në drejtësi. Mbledhja me Kryeministrin ka qenë e planifikuar më parë. Mendoj që të gjithë duhet të punojmë që 18 qershori t’i japë Shqipërisë notën më të mirë për zgjedhjet”, tha Meta.
Kurse lidhur me protestën e opozitës në bulevard, Meta shtoi:
“Opozita duhet të kthehet në parlament. Për mua Parlamenti pa opozitën nuk ka kuptim. Të bëjmë të gjitha përpjekjet që të përmirësohet klima tani që jemi në një moment të rëndësishëm për reformën në drejtësi. Negociatat nuk hapen pa u zbatuar vetingu dhe pa u realizuar standardet më të larta në 18 qershor. Kuvendi do të zhvillojë në mënyrën mën transparente të gjitha procedurat që i takojnë”, u shpreh Meta.
