Mediat italiane kanë publikuar atë që e cilësojnë si skenë të denjë për filmat horror, sulmin nga i dashuri shqiptar ndaj Alessandra-s, 40-vjeçares, e cila është lënduar në zjarrin që ra në banesën e saj në Nocera të Italisë më 29 Janar.
Mësohet se Alessandra ka treguar se ishte shtrirë në divan për të fjetur kur ka dëgjuar zhurmë te dera dhe ka parë shqiptarin Hasan Varoshi, ish-të dashurin, të ngjiste shkallët, raportojnë mediat lokale.
Varoshi kishte me vete një shkop dhe një bidon me benzinë.
Gruaja ka thënë në rrëfimin e saj se është shtyrë dhe është rrahur me shkop, ndërkohë që 25-vjeçari spërkaste me benzinë shtëpinë.
Por në këtë moment ka shpërthyer zjarri dhe të dy nxituan të dilnin nga dritarja, me shqiptari që ka ndihmuar edhe Alessandra-n.
Varoshi i ka kërkuar Alessandra-s mos ta shkatërronte.
Sakaq sipas mediave italiane hetimet janë duke u fokusuar edhe te një bashkëpunëtor, me të cilin Hasani ka shkuar deri në shtëpinë e italianes.
Nga ana tjetër për avokatin e Hasanit, Ubaldo Minelli, deklaratat e Alessandras janë të pabesueshme.
Varoshi, aktualisht është nën masën e sigurisë ”arrest me burg”. Në deklaratat e tij para drejtësisë italiane, shqiptari ka thënë se i ka shpëtuar jetën italianes e se akuzat e kësaj të fundit janë të pavërteta.