Ish-kryeministri Sali Berisha i është përgjigjur deklaratave të bëra nga Knut Fleckenstein gjatë mesditës së sotme. Me anë të një mesazhi në rrjetin social ‘Facebook’ Berisha sqaron Fleckenstein se Soros është spekulanti më i madh dhe ka korruptuar njerëz deri në Berlin.
Berisha kërkoi hetim ndërkombëtar për aktivitetin e Soros-it në Shqipëri, duke shtuar se ka prova për mafiozin, siç e cilëson.
“Ne kete kontekst, mendoj se jo hedhja poshte me apriori apo paragjykime te zerave qe kerkojne te nxjerrin ne shesh nje te vertete tronditese, por hetimi me transparence nga parlamenti europian dhe parlamente te vendeve te interesuara duhet te ishte pergjigja e duhur dhe respekti i detyruar nga e verteta.”, tha Berisha.
Deklarata e plotë e ish-kryeministrit Sali Berisha
Deputeti i Parlamentit Europian dhe reporteri për Shqipërinë, Knut Fleckenstein në nje konference shtypi sipas mediave nder te tjera ka deklaruar sa vijon:
“Kam shumë respekt për Berishën, ndoshta më shumë sesa mendoni ju dhe këtë e kam me të vërtetë. Por ama do të doja që t’i kërkoja të mos fliste më për këto përralla sorosiane, e njëjta histori që kam dëgjuar edhe në Maqedoni. Zoti Berisha nuk është i dobët”, tha deputeti i parlamentit Europian që vizitoi Tiranë këto dy ditë.”
Me këtë rast, duke shprehur me sinqeritet vlerësimin tim të palëkundur për kontributin e tij qenësor personal dhe të Parlamentit Europian në dekriminalizimin, por dhe probleme të tjera të vendit, me duhet t’i them se deklaratën e tij e konsideroj te ngutur dhe të pa bazuar për arsyet që vijojnë:
– Deklaratat e mia për Xhorxh Soros dhe mafien e tij, si një rrezik madhor për demokracinë shqiptare janë të bazuar jo në hamendje, por në dokumente autentike të pakundërshtueshme nga të gjithë ata që duan të besojnë të vërtetën.
– Denoncimet e mia në parlamentin shqiptar ndaj veprimeve mafioze të Soros dhe networkut të tij në Shqipëri, të bazuara në dokumente dhe fakte, datojnë vite më parë dhe nuk kanë lidhje me polemiken e sotme që zhvillohet në SHBA për veprimtarinë e kryespekullantit të planetit.
– Xhorxh Soros përfaqëson sot miliarderin që ka korruptuar më shumë se kushdo tjetër mbi tokë politikanë, personalitete lokale dhe ndërkombëtare në vendet ish-komuniste, por edhe në vende të tjera. Ai ka korruptuar gjithashtu individë dhe grupe në institucione serioze ndërkombëtare të vendosura në kryeqytete të vendeve të ndryshme përfshi këtu Berlinin!
Në këtë kontekst, mendoj se jo hedhja poshtë me apriori apo paragjykime të zërave që kërkojnë një të vërtetë tronditëse, por hetimi me transparencë nga Parlamenti Europian dhe parlamente të vendeve të interesuara duhet të ishte përgjigja e duhur dhe respekti i detyruar nga e vërteta.
Se fundi, shtoj se me deklaratat e mia kam vetëm një qëllim: Të mbrojë një të vërtet që e vlerësoj se ka interes të padiskutueshëm për vendin tim, por edhe miqtë e mi kudo që janë!
