Kreu i PD-së, Lulzim Basha ka mbajtur një fjalë në mes të protestueve që ndodhen në ‘çadrën e lirisë’.
Duke folur për mbështetësit e opozitës dhe përballë shqiptarëve, Basha u shpreh se çdo moment është duke u rritur mbështetja jo vetëm nga qytetarët por edhe nga ndërkombëtarët.
“Në këtë shesh që e kemi pagëzuar si sheshin e lirisë për çdo qytetar. Konsensusi qytetar po rritet nga momenti në moment. Mbështetja nga partnerët ndërkombëtarë po rritet çdo moment, për kërkesën tonë legjitime: Zgjedhje të lira e të ndershme.
Ne nuk jemi mbledhur këtu për kauzën e Lulzim Bashës apo PD-së, por për të ardhmen e Shqipërisë. Kjo i ka dhënë kauzës tonë, një forcë të papërballueshme nga krimi e padrejtësia”, u shpreh Basha.
Kreu i PD-së e quajti çadrën e mbushur me protestues një hapësirë lirie dhe demokracie. Ai akuzoi kryeministrin Edi Rama se ka ngritur fasada por se pas fshihet rrëmujë, kaos dhe varfëri.
“Ku jemi sot këtu, jemi në hapësirën e parë të lirisë së re që po vjen, të demokracisë së standardit europian, ku qytetarët nuk kanë frikë të thonë të vërtetën. Ky është sheshi nga ku nisim projektin e jetës sonë, demokracinë dhe fitoren e çdo qytetari. Përballë nesh kemi një fasadë, një fasadë nga mjeshtri i fasadave, i cili gjithë jetën e tij është shquar për fasada. Fasada dhe bojë përpara, rrëmujë kaos dhe varfëri nga prapa. Ky ka qenë realiteti i fasadave të shpëlara dhe të dala boje. Në këto 4 vite ka ndërtuar një parlament fasadë, një demokraci fasadë. Një parlament fasadë i cili nuk përfaqëson popullin shqiptar”, tha Basha.
