Policia ka gjetur një pjesë tjetër të parave që u grabitën më 9 shkurt në Qafë-Kashar.
Express mëson se uniformat blu kanë zbuluar në zonën e Bathores një shumë parash të groposura brenda një tenxhereje. Nuk dihet ende se sa është shuma që ndodhet në tenxhere, por ajo që është e sigurt është fakti se bëhet fjalë për paratë e Bankës Kombëtare Tregtare që u grabitën në pritë teksa transportoheshin me dy makina blind drejt aeroportit të Rinasit.
Më herët, policia gjeti një pjesë tjetër të parave, të groposura në disa tenxhere presioni në Vlorë, pranë banesës së Neim Avdulajt, dhe një shumë tjetër në servisin e Fatjon Xhyliut, të dy të arrestuar për ngjarjen.
Deri më tani në pranga për grabitjen spektakolare të 3.2 milionë dollarëve të bankës, janë vënë 5 persona. I fundit u arrestua mbrëmë në Dibër, dhe bëhet fjalë për Admir Cerpjën.
Në kërkim është edhe personi që konsiderohet si “koka” e bandës, Admir Murataj, për të cilin policia është duke zhvilluar aksione të gjera për ta kapur.
Ndërkohë, vetëm i arrestuari Ernest Kupa nuk ka pranuar të ketë lidhje me grabitjen. Prokuroria ka faktuar se kjo bandë është autore edhe e grabitjes së ndodhur më 3 dhjetor 2015 në rrugën e Rinasit, ku sërish u vodhën lekët e një banke, në të njëjtën mënyrë
