Protesta e opozitës e nisur mesditën e sotme ka vijuar pa ndalim. Organizatorët thonë se ajo nuk ka afat derisa të plotësohen kërkesat e tyre.
Të mbledhur në një çadër të madhe të ngritur mes të kryeministrisë dhe Kryesisë së Kuvendit qytetarët kërkojnë rrëzimin e qeverisë. Mbrëmja ka qenë më e qetë. Protestuesit qëndrojnë brenda çadrës. Aty ka stola prej druri, tavolina të improvizuara si dhe ushqim. Brenda çadrës dominon muzika.
Protestuesit demokratë do të kalojnë natën në çadër. Ata janë organizuar me turne në mënyrë që çadra të mos mbetet vetëm me qytetarë protestues, por edhe politikanë. Në çadër ndodhen rreth 1 mijë veta. Kreu i Partisë Demokratike Lulzim Basha thotë se nuk do të ndalet derisa të vendoset që zgjedhjet t’i organizojë një qeveri teknike.
