Një person ende i paidentifikuar ka tentuar të grabisë një kazino me një pistoletë në dorë, mbrëmjen e djeshme në afërsi të qëndrës së Tiranës, por është përballur dhe ndaluar nga grushtat e rojes private.
Burime nga policia thanë se këtë të dielë, një person rreth të tridhjetave hyri në një kazino tek rruga e Dibrës, pranë Selvisë me një pistoletë në dorë.
Pistoleta rezultoi të ishte lodër, por pa e ditur këtë, roja i kazinosë e ka dalluar “armën” që mbante në dorë personi dhe e ka goditur me grushta. I sulmuar menjëherë nga roja i kazinosë, grabitësi është larguar dhe “arma” i ka rënë në tokë, thanë burime nga policia.
Menjëherë është lajmëruar policia, ndërsa personeli i kazinosë konstatoi se pistoleta ishte lodër. Dyshohet se i njëjti person, ka kryer disa grabitje në Tiranë me të njëjtën mënyrë.
