Policia e Skocisë ka lajmëruar se hixhabi do të bëhet pjesë e uniformës zyrtare, me qëllimin e krijimit të një force të larmishme.
Policia tha se shpresohet që kjo lëvizje do të inkurajojë gratë nga komunitetet muslimane, të cilat ndoshta më parë nuk e kanë pasur policinë si opsion në karrierë, që ta rikonsiderojnë këtë.
Në të kaluarën, oficeret myslimane në Skoci lejoheshin që të mbajnë hixhabin, mirëpo vetëm pasi të aprovohej kjo nga instancat më të larta.
Në një komunikatë, shefi i policisë Phil Gormley tha: “Jam i kënaqur të bëj këtë njoftim dhe unë mirëpres përkrahje nga komuniteti mysliman dhe komuniteti më i gjerë, si dhe nga stafi i policisë.”
“Ashtu si shumë të punësuar tjerë, veçanërisht në sektorin publik, ne sigurohemi që t’u shërbejmë komuniteteve tona. Shpresoj se ky freskim në uniformën tonë do të kontribuojë në larminë e stafit tonë, duke shtuar eksperienca dhe kualitete të reja”, theksoi ai.
Lajmi u mirëprit nga Shoqata e Policëve Myslimanë në Skoci, grup ky që ka qëllim të krijojë lidhje mes komuniteteve myslimane vendase dhe policisë.
Fahad Bashir, drejtori i shoqatës, tha: “Ky është një hap pozitiv në rrugën e drejtë, dhe unë jam i kënaqur që policia skoceze po ndërmerr hapa produktivë që të tregojë se ata janë gjithëpërfshirës dhe i përfaqësojnë të gjitha komunitetet që u shërbejnë në vend”.
“Pa dyshim se ky hap do të nxisë më shumë gra nga bashkësitë muslimane që t’i bashkohen policisë skoceze”, shtoi më tej Bashir.
Sipas statistikave të fundit të bëra nga autoritet skoceze, vetëm 127 (2.6%) prej 4.809 aplikimeve për t’iu bashkuar policisë, ishin nga minoritetet.
