Policia e Krujës ka vënë në pranga një 46-vjeçar që përndiqte një biznesmen.
Sipas policisë, në orët e para të mëngjesit të sotëm i është vendosur tritol biznesit, mobileri të një shtetasi.
Specialistët për Krimet në Komisariatin e Policisë Krujë, pas një pune hetimore intensive dhe të specializuar kanë bërë të mundur zbardhjen dhe dokumentimin në kohë rekord të ngjarjes duke arrestuar autorin e dyshuar, konkretisht shtetasin:
Riza Haka, 46 vjeç, banues në Nikel.
Haka, më datë 12.02.2017, rreth orës 01:27, në Nikël, Krujë, për motive të dobëta, dyshohet se ka vendosur një sasi lënde eksplozive, tritol në biznesin (mobileri) e shtetasit B.B.
Nga kryerja e veprimeve hetimore është dokumentuar se shtetasi i mësipërm rreth një muaj më parë ka djegur edhe dy makina të shtetasit B.B. dhe vëllait të tij, shtetasin P.B., konkretisht:
1. Më datë 26.01.2017, dyshohet se shtetasi i mësipërm ka djegur mjetin tip “Benz” me targa AA 508 OA, në pronësi të shtetasit E.M.(djali i shtetasit B.B.).
2. Më datë 10.02.2017, dyshohet se shtetasi i mësipërm ka djegur mjerin tip “Volkswagen” me targa AA 145 PM, në pronësi të shtetasit A.B. (djali i P.B.).
Gjatë kontrollit të ushtruar në banesë iu gjetën dhe sekuestruan në cilësinë e provave materiale:
• një pushkë;
• rreth 35 kg lëndë narkotike e dyshuar e llojit Cannabis Sattiva;
• lëndë djegëse, benzinë.
Materialet i kaluan Prokurorisë së Rrethit Gjyqësor Krujë për veprime të mëtejshme për veprat penale “Shkatërrimi i pronës me eksploziv”, “Prodhimi dhe shitja e narkotikëve” dhe “Prodhimi dhe mbajtja pa leje e armëve luftarake dhe e municionit”.
