Tashmë është vendosur. Niveli i pagës minimale në vend do të rritet. Masa e saj do të përcaktohet javën e ardhshme në mbledhjen e Këshillit Kombëtar të Punës. Këtë e thotë ministri i Mirëqenies Sociale dhe Rinisë, Bledi Klosi.
“Në javën në vazhdim ne do të kemi një vendim të Këshillit Kombëtar të Punës, që është duke negociuar dhe dakordësuar me grupet sindikaliste dhe me grupet përfaqësues të punëdhënësve për rritjen e pagës minimale”.
E sigurt është paga minimale për punonjësit e administratës shtetërore, e cila pëson një rritje prej 35%, duke filluar nga muaji i ardhshëm.
“Besoj jeni njohur me vendimin e Kryeministrit për të pasur një rritje të pagës minimale për të gjithë punonjësit e administratës publike, e cila nuk mund të jetë më poshtë se treqind e shtatëdhjetë mijë lekë të vjetra”, vuri në dukje Klosi në Kongresin e 7-të të sindikatave.
Teksa sindikatat i kanë kërkuar qeverisë që vendimi për rritjen e pagës minimale të prekë edhe punonjësit e bizneseve private, fasoneritë kanë dalë kundër që në krye të herës.
“Vazhdojmë të marrim kërkesa të vazhdueshme. Për shembull, bizneset e mëdha fason nuk kërkojnë rritje shumë të mëdha të këtij niveli, pasi kjo do të ndikonte në tregun e punës rajonal dhe prandaj vazhdojnë negociatat dhe ju shumë shpejt do të njiheni me vendimin e fundit”, deklaroi ministri i Mirëqenies Sociale.
Kodi i Punes
Në diskutimin për Kodin e ri të Punës, tashmë të miratuar, ministri Klosi vuri në dukje disa aspekte që mbrojnë të drejtat e të punësuarve
“Kodi i Punës garanton për herë të parë barazinë në trajtimin në punë dhe punësim, duke eliminuar diskriminimin, garanton shpërblim njëlloj për burrat dhe për gratë, trajtim të barabartë të punonjësve me kontratë me afat të përcaktuar, garanton përgjegjësitë e punëdhënësve për t’i informuar punëmarrësit me afat të përcaktuar për vendet e reja të punës, rregullime për definicionin e punës së natës, parashikon çdo gjashtë orë punë 20 minuta pushim, parashikon numrin maksimal të orëve shtesë jo më tepër se 200 orë në vit”.
Ministri vuri në dukje se dikasteri që drejton po punon për të ndërtuar politika që mbështesin punën e denjë dhe të mirëpaguar.
