Ermira Arapi, e cila u vra dje nga i dashuri me të cilin kishte një lidhje jashtëmartesore, u përcoll sot për në banesën e fundit.
29-vjeçarja, nëne e një vajze 5-vjeçare është varrosur sot në Ngurrëz të Lushnjës, në vendlindjen e saj, pasi familja e bashkëshortit që jetonte në Greqi nuk pranoi që ajo të prehej në Fier.
Mësohet se publikimi i faktit se Arapi ishte në një lidhje jashtëmartesore me Drini Dervenin, i cili po ashtu i dha fund jetës me armën e krimit, kanë bërë që familja e burrit mos të tolerojë veprimin e nuses së tyre.
Edhe familja e Ermirës nuk ka hapur dyert e mortit në fshatin Fermë Çlirim të Fierit, atje ku jetonte prej disa vitesh.
Sakaq nuk dihet nëse bashkëshorti i saj dhe vajza, që jetonin të dy në Greqi, kanë marrë pjesë në ceremoninë mortore, që u mbaj në orën 13:00 në Ngurrëz.
