Kreu i Partisë Demokracia Sociale, Paskal Milo, aleat i koalicionit qeverisës, duke folurnë një intervistë për gazetën “Dita” është shfaqur i dakortësuar me shqetësimin e ambasadorit amerikan Lu dhe atë të opozitës se zgjedhjet e 18 qershorit rrezikojnë realisht që të vidhen.
“Nga sa jam unë i informuar po bëhen përpjekje që “njerëzit e fortë” që dekriminalizimi mund ti pengojë të kandidojnë do të delegojnë njerëz të tjerë të tyre besnik ….Unë jam shumë skeptik se parlamenti i ardhshëm do të jetë më i mirë. Mund të ketë më shumë gra e vajza, të rinj, por vështirë se do të shpëtohet nga modeli aktual i të qenit deputet në Kuvend. Ata janë produkt i sistemit, e për sa kohë që sistemi nuk ka ndryshuar e kryetari i partisë harton listat e deputetëve “të fortë” që sigurojnë vota me çdo kusht e më çdo çmim, do të jenë përsëri në parlamentin e ardhshëm. Askush të mos ushqejë iluzione”, tha Milo.
Milo flet edhe për kërkesën ultimative të opozitës dhe të një pjese të mirë të opinionit publik, për futjen e votimit dhe numërimit elektronik që në këto zgjedhje me synim shmangien e vjedhjes së votës dhe blerjen e saj.
“Aktualisht janë rreth 200-250 mijë vota të qytetarëve shqiptarë që shprehin vullnetin e tyre e që votojnë për partitë e ashtuquajtura të vogla, por që numërohen nga përfaqësuesit e dy apo katër partive në grupin e numërimit të votave. Kjo është një praktikë e pandershme e ligjëruar e që nuk ka asgjë të përbashkët me parimin e e gjithë pranuar demokratik të zgjedhjeve të lira e të ndershme. Numëruesit në Shqipëri nuk kanë qene e nuk do të jenë asnjëherë të paanshëm, për sa kohë që do të caktohen nga partitë politike. Ndaj edhe praktika e numërimit elektronik në vende të tilla si Shqipëria që nuk ka traditë e kulturë demokratike zgjedhore e njerëz të pa kapur nga politika e korrupsioni është më se domosdoshme”, thotë Milo.
“Një mënyrë tjetër e vjedhjes masive të votave e që jam o bindur se në zgjedhjet e 18 qershorit do të jetë parësore është blerja e votave, veçanërisht në zonat rurale. Aq masiv është ky fenomen sa që sot nuk diskutohet vetëm për metodat e blerjes së votave, që janë bërë gjithnjë e më të sofistikuara, por më tepër për shtrirjen e këtij fenomeni jo vetëm në zonat rurale e në shtresat e varfra e pa kulturë minimale politike, por edhe në shtresa qytetare me të ardhura të pakta ose me premtime për punësim e favore të tjera”, shton Milo.
