Duke mbajtur një fjalim të gjatë në konferencën shkencore, mbajtur sot në Bibliotekën Kombëtare të vendit, teksa ka lartësuar figurën e Musine Kokalarit, shefi i ekzekutivit Edi Rama premtoi se pas saj do të vijojë zinxhiri i të vërtetave të fshehta për shumë personazhe në vend.
“Puna e hapjes së dosjeve të regjimit komunist do të fillojë me dosjen e Musine Kokalarit për të hedhur dritë mbi këtë histori, si një nga momentet më të rëndësishme kur është përplasur egërsisht, ajo që erdhi më pas si fuqi e gjithpushtetshme mbi shqiparët me përpjekjen idealiste për të shkuar drejt një Shqipërie tjetër drejt Luftës së Dytë Botërore”- tha Rama.
“Dosja e Musinesë do të jetë e para që do hapë një rrugë të re, shqyrtimin e gjithë dokumenteve dhe njohjen me gjithë personazhet që i kanë ikur dritës së të shkurës dhe na janë shfaqur me dy gishtat lart përballë prozhektorëve të të sotmes”.
Rama theksoi se dekodifikimi i plotë i dosjes së saj shënon edhe pragun jo vetëm të pakthyeshëm, por vendos një gur themeli të moralit të gjithë kësaj historie të re në raport me plagët e diktaturës që vazhdojnë të infektojnë jetën tonë të përbashkët në këtë vend.
“Sot pushkatimet bëhen me gjuhën e baltës, diskreditimit, pa fre, të atyre që thjesht nuk janë tanët. ditën për diell, ditë natë, pa pushim duke rrotulluar thikën e vjetër dhe të përgjakur të përcarjes së të shkuarës në zemërën e shoqërisë sonë e duke bërë që edhe fëmijët në kopshët të jenë të ndarë si pasojë e asaj që dëgjojnë në shtëpi, ku prindërit e tyre janë të ndarë me prindërit e fëmijëve përballë”- tha Rama.
