Kryetari i Partisë Demokratike Lulzim Basha ka zhvilluar një takim pasditen e sotme me të rinjtë demokratë, me të cilët bashkëbisedoi për të ardhmen e tyre, mundësitë që do t’u ofrojë opozita kur të jetë në qeveri dhe për protestën e 18 shkurtit.
Gjatë fjalës së tij Basha ripërsëriti premtimin se në ditën e tij të parë si Kryeministër, vendimi që do të marrë do të jetë ai i anulimit të ligjit të arsimit të lartë.
Basha u zotua se do të jetë në krah të të rinjve, duke bërë politika që do t’u krijojnë atyre mundësi studimi dhe punësimi.
Sa i përket protestës së 18 shkurtit, kryetari i PD theksoi se nuk do të jetë protestë e demokratëve por e të gjithë shqiptarëve për të kundështuar ministrat e korruptuar të qeverisë dhe lidhjet e tyre me kriminelë.
Fjala e kryetarit të PD Lulzim Basha:
Çfarë kërcënimi kemi sot? Sot kemi kërcënimin nga një tjetër tirani. Duket sikur i kemi liritë tona. Hajduti gënjeshtari krimineli jo vetëm çan përpara por arrin majat. Ky është nj vend i robëruar. E kam fjalën për lirinë nga e keqja. Do përmend një fjalë shkencore, që rrjedh nga greqishtja. Kakos, kaka, më e keqja. Sundohesh nga e keqja. Sundohesh nga antivlera. Gjendja në Shqipëri është alarmante, vendi është në kaos. Shumica e të rinjve e kanë mendjen të largohen nga vendi.
Shikoni çfarë ligji kaluan për arsimin e lartë. Centralizim total, nëpërkëmbje e pedagogëve…Tani rriten shpenzimet, rriten tarifat. Prandaj është e domosdoshme ta zmbrapsim. Dita ime e parë si Kryeministër do jetë anulimi i ligjit të arsimit të lartë. Do të jem në krahun tuaj. Cili qëllimi i kësaj? Të ndalë të keqen, të ndalë largimin e të rinjve, të nisë rikthimin e tyre.
Liria për të zgjedhur përcakton çdo liri tjetër. E ka kuptuar këtë edhe e keqja, prandaj do të shkatërrojë zgjedhjet shqiptare. Tani shpresën e vetme e ka të prishë zgjedhjet. Ne nuk do ta lejojmë kurrë. Më 18 shkurt do të ushtrojmë të drejtën tonë më fisnike. Do të bashkohemi të gjithë për të treguar sa shumë jemi ne, ne shqiptarët që kemi respekt për veten tonë, për njëri-tjetrin dhe që nuk pranojmë zgjedhje të kapura nga politikanët e korruptuar. Më 18 shkurt në Tiranë mblidhen në një protestë mbarëpopullore që i kalon kufijtë politikë që i bashkohen shqiptarët një vendim i madh.
