Në nisje të këtij sezoni turistik veror ritet të nisë linja e fluturimeve direkt Tiranë-Tel Aviz.
Në ditën e dytë të vizitës zyrtare në Izrael, Ministrja e Zhvillimit Ekonomik, Turizmit, Tregtisë dhe Sipërmarrjes Milva Ekonomi, e shoqëruar nga Ambasadori ynë në Tel Aviv, Bardhyl Canaj, u prit në një takim nga Ministri i Turizmit të këtij vendi Yariv Levin.
Gjatë takimit u diskutuan çështje të ndryshme që prekin bashkëpunimin në fushën e turizmit mes dy vendeve, ku fokusi u vu tek konkretizimi i linjës direkte të fluturimit Tiranë-Tel Aviv. Kjo linjë direkte do të sjellë një ndikim më të madh në rritjen e fluksit të turistëve në të dyja vendet dhe do të promovojë Shqipërinë turistike në një treg i cili po zhvillohet me shpejtësi kohët e fundit.
Në vijim të vizitës Ministrja Ekonomi zhvilloi dhe një takim me kreun e një prej kompanive që ofrojnë shërbime të fluturimeve civile në Izrael, z. Joseph Adar për të diskutuar mundësitë reale të operimit të linjës së fluturimit Tiranë-Tel Aviv, duke nisur që prej fillimit të këtij sezoni turistik veror.
Ministrja Ekonomi në ditën e parë mori pjesë në ceremoninë e hapjes së Panairit Ndërkombëtar të Turizmit IMTM 2017 në Tel Aviv, ku Shqipëria përfaqësohet nga Agjencia Kombëtare e Turizmit dhe disa operatorë turistikë, si një mundësi për të promovuar bukuritë e Shqipërisë dhe destinacionet kryesore turistike të saj në gjithë botën.
