Kontrolli i Lartë i Shtetit gjeti disa problematika në marrëdhëniet financiare ndërmjet kompanive publike të energjisë sidomos në raport me sistemin e detyrimeve që i kanë njëra tjetrës.
Në një inspektim të posaçëm për këtë qëllim, Kontrolli i Lartë i Shtetit vërejti se me gjithë masat e marra nga ana e qeverisë, me një kuadër mbështetës ligjor, për të krijuar një sistem energjetik të qëndrueshëm dhe me aftësi likuiduese, rezulton që shoqëritë publike të sektorit energjetik janë ende larg realizimit të këtyre objektivave.
KLSH thotë kriza financiare që po kalojnë shoqëritë publike të sektorit energjetik, ka vështirësuar aktivitetin normal të secilës prej tyre, pasi ato kanë marrëdhënie të ndërvarura sipas modelit të tregut të energjisë.
Sipas KLSH detyrimi total i KESH, OSHEE dhe OST, deri më datën 20 shtator 2016, është 80.6 mld lekë.
Detyrimi i OSHEE ndaj KESH për blerjen e energjisë elektrike është 50.9 mld lekë (370 mln lek).
Detyrimi OSHEE ndaj KESH për huatë afat-gjata është 11.3 mld lekë.
Detyrimi i OSHEE ndaj OST për transmetim energjie, shërbime dhe kredi është 8.2 mld lekë.
Detyrimi i OST ndaj KESH për energji, shërbime dhe kredi, është 10.2 mld lekë.
Në bazë të marrëveshjes për zgjidhjen me mirëkuptim, detyrimi i mbetur i OSHEE ndaj CEZ AS, deri më datë 20 shtator 2016, është 5.8 mld lekë vëren KLSH.
Në përfundim të procesit të Kontrollit Kontrolli i Lartë i Shtetit rekomandon se OSHEE, OST dhe KESH, të respektojë masën e pagesës për detyrimet e ndërsjella, sipas përcaktimit në ligjin nr. 170/2014, “Për ratifikimin e Marrëveshjes së huasë”, KLSH ka vërejtur se nuk ka një studim të saktë, mbi prognozën e ecurisë së shlyerjes së detyrimeve të ndërsjella, veçanërisht në skedulin e pagesave dhe objektivave të vendosura ndaj OSHEE.
Gjithashtu OSHEE, OST dhe KESH, të hartojnë një program të saktë për pagesat e detyrimeve të ndërsjella, sipas afateve të caktuara në projektin e rimëkëmbjes, rekomandon KLSH. Monitor
