Atentati i ndodhur mbrëmjen e djeshme në qendër të Laçit ku mbeti i plagosur me pistoletë një i ri nga Tirana, është zbardhur.
Burime nga policia thanë se rreth orës 19:00 është marrë njoftim se në qytet Laç-Kurbin, ka të shtëna me armë zjarri dhe një person ka ngelur i plagosur.
Menjëherë në vendngjarje kanë mbërritur shërbimet policore ku kanë konstatuar se ka mbetur i plagosur 28-vjeçari me inicialet L. R., banues në Tiranë , i cili është dërguar në Spitalin e Traumes në Tiranë për kujdesin e nevojshëm mjekësor ku aktualisht ndodhet jashtë rrezikut për jetën.
Falë veprimeve të shpejta profesionale hetimore, u bë i mundur identifikimi i autorit të dyshuar të kësaj ngjarje të rëndë, ku rezultoi të jetë shtetasi me iniciale Martin Trokthi 22 vjeç, banues në Laç, me precedentë të mëparshëm penale, i cili u shpall person në kërkim dhe punohet për kapjen e tij.
Nga hetimet paraprake dyshohet që ngjarja të ketë ndodhur pas një konflikti për motive të dobëta në ambientet e një lokali, midis të dëmtuarit dhe shokëve të tij prezent, me të dyshuarin Trokthi.
Në kohën që shtetasi L. R., ka qenë duke u larguar me makinën tip Nissan së bashku me 3 persona të tjerë shokë të tij, është qëlluar disa herë me armë zjarri nga Martin Trokthi i cili më pas është larguar nga vendi i ngjarjes.
Dosja i është dërguar Prokurorisë së Kurbinit për veprën penale “Vrasje në rrethana të tjera cilësuese e mbetur në tentativë”, “Prodhim dhe mbajtje pa leje e armëve luftarake dhe municionit”.
