Kreu i Kuvendit dhe njëherësh edhe kreu i Lëvizjes Socialiste për Integrim, Ilir Meta ka përsëritur qëndrimin e tij për fatin e koalicionit, se në rast se PS mendon se ka mazhorancën pa LSI, atëherë ai që nesër është i gatshëm të dalë në opozitë.
I pyetur nga gazetari Sokol Balla në emisionin “Top Story”, Meta saktësoi se nuk ka hapur asnjë debat dhe asnjë konflikt por i ka dhënë përgjigje kryeministrit Rama që tha se koalicioni me LSI është strategjik dhe se mazhoranca mund të jetë edhe pa këtë forcë politike.
Në këtë kuadër, Kryeparlamentari nënvizoi se LSI nuk është shtojcë e asnjë qeverie.
“Unë nuk kam hapur debat, por kam sqaruar pozicionin e LSI pas këtij debati të hapur. Të them të drejtën këtë debat e ka hapur Rama ku thosht se i kemi 71 mandate edhe pa LSI dhe se me LSI kemi marrëveshje strategjike. LSI nuk është dhe nuk do të jetë kurrë shtojcë në qeveri. Nëse krijohet një mazhorancë pa LSI pse duhet të krijohet një shtojcë në qeveri. LSI ka synim integrimin e vendit në BE.” tha Meta
Sa i përket zgjedhjeve të 18 Qershorit, Meta nënvizoi se data e votimit është ende e largët ndërsa shtoi se garancia dhe mbarëvajtja e zgjedhje është me rëndësi jetike për të ardhmen europiane të Shqipërisë.
“Më 18 Qershor është shumë larg nga sot. Nuk duhet të nxitohemi por ajo që duhet të ndodhë është zgjedhje perfekte. Shqetësimet e opozitës për zgjedhje? Më thuaj një herë që nuk ka patur shqetësime opozita në këtë vend për zgjedhjet. Ajo që është e rëndësishme është një klime politike racionale. Nëse pala tjetër shkon në zgjedhje duke menduar se do të humbasë, dhe o burra të legjitimojmë gjithçka, është çështje dhe qëndrim serioz sepse flitet për të ardhmen e vendit. Cilësia dhe nota në këto zgjedhje do të jetë vendimtare për kohën kur do të hapen negociatat e anëtarësimit. Zgjedhja dhe klima në zgjedhje duhet të jetë sa më e qetë.” tha Meta
