Kreu i Kuvendit Ilir Meta ka folur në studion e “Top Story” lidhur me konfliktin dhe replikat e ashpra ndërmjet Prokurorit të Përgjithshëm Adriatik Llalla dhe ambasadorit të SHBA në Tiranë Doland Lu.
Në intervistën e tij, zoti Meta theksoi se nuk i është paraqitur apo thënë më parë asnjë shqetësim në përzgjedhjen e anëtarëve në Këshillin e Emërimeve në Drejtësi si nga ana e ambasadorit Lu ashtu edhe Kryeprokurorit Llalla.
“Së pari ne kemi një marrëdhënie të qëndrueshme dhe të drejtpërdrejtë me ambasadën e SHBA. Ne kemi komunikim të herërpashershëm. Unë nuk kam patur asnjë shqetësim lidhur me hedhjen e shortit për KED-në të shprehur nga ambasada e SHBA. Kam patur një sygjerim përpara si kryetar i Kuvendit, kur Prokurori i Përgjithshëm, shpall procedurat për zgjedhjen e zëvendës prokuorrit të përgjithshëm. Pasi kemi marrë këtë shqetësim zyrtar, kemi kontaktuar me sekretaren e përgjithshme, dhe mendimi i tyre ka qenë që ky shqetësim qëndron. Atëherë u kam kërkuar që të komunikoj me Prokurorinë e Përgjithshme që të mos bëhen veprime të kontestueshme. Atëherë kam vendosur për ndërprerjen e këtyre procedurave. Për rastin konkret unë nuk kam patur ndonjë shqetësim konkret.” tha Meta
Më tej Kryeparlamentari foli edhe për konfliktin e Prokurorisë për serverin e ILDKPKI. Meta nënvizoi se është vënë në dijeni si nga Llalla ashtu edhe nga kreu i ILDKPKI-së Shkëlqim Ganajt, lidhur me hetimin e Prokurisë, por shtoi se ka kërkuar nga të dy që përpos këndvështrimeve të ndryshme, të gjejnë ura bashkëpunimi konform ligjit.
“Sa i përket serverit të ILDKPKI, është e drejtë e ambasadorit të shfaqë shqetësimin e tij. Sapo zoti Ganaj më ka ngritur këtë shqetësim, jam takuar disa herë me të dhe me Prokurorin e Përgjithshëm, që të jenë bashkëpunues me njëri-tjetrin. Kanë patur këndvështrime të ndryshme, lidhur me këtë proces hetimor, ku Prokuroria pretendonte se kishte veprime të paligjshme të ILDKPKI. E vetmja gjë që kam kërkuar ka qenë që çdo veprim të ishte i ligjshëm dhe në respekt të vendimit të gjykatave.” u shpreh kryeparlamentari
